Biełarusu ŭdałosia dabicca ad Meta prychavańnia źviestak pra svoj danat praz fejsbuk
U redakcyju vydańnia «Zierkało» źviarnuŭsia biełarus i raskazaŭ, što jamu ŭdałosia schavać u svaim fejsbuk-akaŭncie fakt danata ŭ «Bajsoł» u 2020 hodzie. Raniej kampanija admaŭlałasia iści ŭ hetym pytańni nasustrač biełarusam.
Mikita, surazmoŭca «Zierkała», žyvie za miažoj, ale płanuje ŭ chutkim časie pryjechać u Biełaruś pabačycca ź siabrami. Viedajučy ab pravierkach telefonaŭ na biełaruskaj miažy, jon vyrašyŭ źviarnucca ŭ słužbu padtrymki fejsbuka i paprasić schavać infarmacyju pra płaciež u BYSOL, bo samastojna heta zrabić niemahčyma.
«Ja pamiataju, jak aśviatlałasia prablema, što infarmacyju pra płaciažy nielha vydalić z profilu. Maŭlaŭ, heta praviły Meta i jany ich nie mianiajuć. Ja źviarnuŭsia ŭ słužbu padtrymki, i spačatku mnie adkazali sapraŭdy hetak ža sama: što nie mohuć dapamahčy, tamu što «hetaja infarmacyja nieabchodnaja dla prazrystaści płaciažoŭ i biaśpieki», — raskazvaje Mikita.
Adnak chłopiec na hetym nie spyniŭsia i pasprabavaŭ usio ž pierakanać słužbu padtrymki ŭ svajoj racyi. Mikita napisaŭ, što «ŭ vypadku Biełarusi ŭsio naadvarot», i mienavita praz najaŭnaść infarmacyi pra płaciež u fejsbuku jamu moža pahražać niebiaśpieka paśla pryjezdu dadomu.
«Da majho ździŭleńnia, dadatkovych pytańniaŭ nie było. Praz dva tydni pryjšło paviedamleńnie pra toje, što maja tranzakcyja časova schavanaja i kali ja zachaču, to mahu znoŭ zrabić jaje bačnaj u fejsbuku. Paśla hetaha moj danat pierastaŭ adlustroŭvacca ŭ profili», — tłumačyć Mikita.
Kiraŭnik fonda «Bajsoł» Andrej Stryžak, kamientujučy hetuju infarmacyju, adznačyŭ, što heta vynik praviedzienaj pierad tym tłumačalnaj kampanii:
«Apošnija niekalki tydniaŭ my prykłali šmat namahańniaŭ dla taho, kab danieści svaju pazicyju da kampanii Meta adnosna niebiaśpieki takoha rodu infarmacyi (ab danatach u BYSOL) u adkrytym dostupie. Źviazvalisia praz roznych partnioraŭ, arhanizacyi, u tym liku praź mižnarodnyja pravaabarončyja arhanizacyi, jakija ščylna pracujuć pa hetaj temie».
Pry hetym jon kaža, što pakul nieviadoma, nakolki takaja padtrymka budzie dla biełarusaŭ usioachopnaj. Na siońnia jon parekamiendavaŭ tym, chto baicca pieraśledu z pryčyny danataŭ, pisać u słužbu padtrymki fejsbuka i takim ža čynam, jak hety čałaviek, abhruntoŭvać situacyju.
«Pakul heta nie sistematyčnaje vyrašeńnie prablemy. Ale našy namahańni pryvodziać da źmieny situacyi. Šmat ludziej zadziejničana ŭ hetym, Ofis Cichanoŭskaj taksama viadzie kansultacyi z sacyjalnymi sietkami, heta pastajanny rabočy praces».
Raniej zasnavalnik BYSOL užo źviartaŭsia ŭ kampaniju Meta z prośbaj vydalić kvitancyi płaciažoŭ z asabistaha kabinieta karystalnikaŭ, adnak u kancy lutaha jon atrymaŭ list z admovaj. U adkazie havaryłasia, što Meta nie moža hetaha zrabić, bo pavodle praviłaŭ unutranaj palityki źviestki pavinny zachoŭvacca ciaham piaci hadoŭ. Pa słovach kampanii, takim čynam jana zmahajecca z admyvańniem hrošaj. Niazhodnym z hetaj pazicyjaj tady prapanavali źviarnucca va ŭrad Irłandyi.
Čytajcie taksama:
Jak schavać, što ty danaciŭ praz fejsbuk? Valeryj Capkała i Andrej Stryžak majuć roznyja mierkavańni
Čytačka, jakuju zabrali za danat: Psichałahičny cisk byŭ strašenny (parady ad našaj čytački)
Ja achviaravaŭ u fondy. Jak zrazumieć, što ja ŭ niebiaśpiecy?
Navat za 40 dalaraŭ. Pačynali z ajcišnikaŭ, a ciapier za danaty pačali ciahać usich zapar
