Bardu Alaksieju Iljinčyku dali dva hady kałonii. Jon pieranios insult
Homielski abłasny sud 28 sakavika vynies prysud pa kryminalnaj spravie 61-hadovaha barda i muzykanta Alaksieja Iljinčyka, paviedamlaje «Viasna».
Alaksiej Iljinčyk
Doŭhi čas było nieviadoma, u čym kankretna abvinavačvajuć hamielčuka. Kančatkova jamu pradjaŭlenyja abvinavačańni ŭ paklopie na Alaksandra Łukašenku (č. 2 art. 367), abrazie Łukašenki (č. 1 art. 368) i raspalvańni inšaj sacyjalnaj varožaści (č. 1 art 130 Kryminalnaha kodeksa).
Spravu razhladaŭ sudździa Alaksiej Chłyščankoŭ.
Pra zatrymańnie Iljinčyka stała viadoma 18 žniŭnia 2022 hoda paśla taho, jak praŭładnyja telehram-kanały paviedamili, što Alaksieja zatrymali z-za «tvorčaj dziejnaści ŭ internecie».
Jaho źmiaścili ŭ SIZA, adnak z-za pieraniesienaha pierad hetym insultu Alaksieju pryjšłosia pravieści ŭ balnicy niekalki miesiacaŭ, pakolki reabilitacyja paśla chvaroby była prablemnaj, i pravy bok cieła byŭ paralizavany. Jak paviedamlała «Homielskaja Viasna», Alaksieja doŭhi čas utrymlivali ŭ sančastcy, dzie dla jaho nie prymali miedpreparaty. Administracyja SIZA tłumačyła heta tym, što, nibyta, usie nieabchodnyja preparaty dla jaho lačeńnia jość i dapamoha jamu akazvajecca.
Dziaržaŭny abvinavaŭca zaprasiŭ dla Iljinčyka try hady pazbaŭleńnia voli.
Sud pryhavaryŭ barda da dvuch z pałovaj hadoŭ pazbaŭleńnia voli ŭ kałonii va ŭmovach ahulnaha režymu.
