Pačali sudzić ajcišnika za «finansavańnie ekstremisckaj dziejnaści». Za try danaty na 75 dalaraŭ
U Minskim haradskim sudzie pavodle č. 2 art. 361-2 Kryminalnaha kodeksa (finansavańnie ekstremisckaj dziejnaści) pačali sudzić IT-śpiecyjalista Rusłana Zavadziča. Jamu inkryminujuć dva danaty ŭ By_Help u žniŭni 2020 hoda na 50 dalaraŭ, a taksama danat Valeru Capkału na sumu kala 25 dalaraŭ u 2021 hodzie. Spravu razhladaje sudździa Žanna Brysina, piša «Viasna».
Rusłana zatrymali prykładna ŭ kancy kastryčnika 2022 hoda. Spačatku niekatory čas jaho ŭtrymlivali na Akreścina, a potym pieraviali ŭ SIZA-1 na Vaładarskaha. Ciapier jaho abvinavačvajuć pavodle č. 2 art. 361-2 (finansavańnie ekstremisckaj dziejnaści).
Pavodle jahonych znajomych, kryminalnuju spravu zaviali za dva danaty ŭ By_Help na ahulnuju sumu 50 dalaraŭ u žniŭni 2020-ha, a taksama pieravod kala 25 dalaraŭ u 2021 hodzie Valeryju Capkału. Pa materyjałach spravy, danaty Rusłan rabiŭ praź biełaruskuju biržu ŭ bitkojnach.
Ale na momant pieravodaŭ ni By_Help, ni Capkała nie byli pryznanyja «ekstremisckimi farmavańniami», heta zdaryłasia značna paźniej.
Zhodna z profilem Linkedin, Rusłan apošnija šeść hadoŭ pracavaŭ u kampanii Netcracker. Raniej jon niejki čas byŭ vałancioram «Achovy ptušak Baćkaŭščyny». Taksama viadoma, što Rusłan — zasnavalnik kłuba astranomii i fatohraf.
Padtrymajcie Rusłana: SIZA-1, 220030, Minsk, Vaładarskaha, 2, Rusłan Hienadźjevič Zavadzič.
Čytajcie taksama:
Za danaty zatrymali supracoŭnika EPAM
Biełarusu ŭdałosia dabicca ad Meta prychavańnia źviestak pra svoj danat praz fejsbuk
