Rasijskaha miljardera biełaruskaha pachodžańnia chočuć pazbavić šviejcarskaha DNŽ
Samaha bahataha na siońnia čałavieka Rasii, miljardera ź biełaruskimi karaniami, Andreja Mielničenku źbirajucca pazbavić dazvołu na žycharstva ŭ Šviejcaryi, jak paviedamlaje miascovaja presa.
Andrej Mielničenka
Šviejcarskija mihracyjnyja ŭłady ličać, što aliharch pravodzić šmat času za miažoj, a nie ŭ Šviejcaryi, a heta nie adpaviadaje ŭmovam nadańnia dazvołu na žycharstva. Jaho spravu ciapier razhladaje sud.
Vydańnie Blick piša, što ŭ Mielničenki DNŽ katehoryi Z — heta svojeasablivaja šviejcarskaja «hryn-karta», u toj čas jak jahonyja žonka i dzieci — hramadzianie ES. Kanton Hraŭbiunden, dzie ŭ Mielničenki jość nieruchomaść, vystupaje, darečy, za toje, kab DNŽ jamu praciahnuć.
U 2023 hodzie Mielničenka ŭznačaliŭ rasijski śpis Forbes z bahaćciem u 25,2 młrd dalaraŭ. U suśvietnym maštabie jon zajmaje 58-je miesca.
Andrej Mielničenka naradziŭsia 8 sakavika 1972 hoda ŭ Homieli. Vučycca jon zjechaŭ u Maskvu, zastaŭsia žyć u Rasii. Syn savieckaha fizika, Mielničenka kinuŭ navučańnie, kali ŭ 1991 hodzie raspaŭsia SSSR, kab zasnavać sietku punktaŭ abmienu valuty. Praz dva hady jon zasnavaŭ svoj bank. Kampanii Mielničenki, u jakich pracuje bolš za 100 tysiač čałaviek, za apošnija 15 hadoŭ inviestavali kala 23 miljardaŭ dalaraŭ u vytvorčaść uhnajeńniaŭ i vuhalu.
Mielničenka trapiŭ pad sankcyi ES i Vialikabrytanii ŭ sakaviku 2022 hoda, a pad sankcyi ZŠA — u žniŭni 2022 hoda. Jon nazvaŭ sankcyi «absurdnymi i biessensoŭnymi» i asprečvaje ich.
Čytajcie taksama:
Niamiecki miljarder, jaki piać hadoŭ tamu źnik u Alpach, znajšoŭsia ŭ Maskvie
