U Biełarusi adkryjuć centr virusałohii, dzie buduć raspracoŭvać vakcyny
Da kanca hoda navukoŭcy abiacajuć pakazać pratatypy dźviuch novych vakcyn. Suprać jakich zachvorvańniaŭ — intryha.
Centr virusałohii ŭ Nacyjanalnaj akademii navuk adkryjecca ŭ najbližejšy čas, piša BiełTA.
«Važny napramak našaj pracy — heta virusałohija i raspracoŭka vakcyn suprać aktualnych infiekcyjnych zachvorvańniaŭ», — kaža dyrektar Instytuta bijafiziki i kletačnaj inžynieryi NAN Biełarusi Andrej Hančaroŭ.
U adpaviednaści z rasparadžeńniem Łukašenki paŭtara hoda pravodziłasia rekanstrukcyja centra virusałohii, jaho asnaščeńnie abstalavańniem.
«Na siońnia ŭsie raboty zavieršanyja, centr hatovy da adkryćcia, jakoje adbudziecca ŭ samy blizki čas. Praca centra budzie ŭ pieršuju čarhu skiravanaja na raspracoŭku mietadaŭ dyjahnostyki, lačeńnie i stvareńnie samych roznych vakcyn. Nad hetym budzie pracavać miždyscyplinarny navukovy kalektyŭ. U centry buduć pracavać śpiecyjalisty jak u virusałohii, tak i ŭ imunałohii, bijatechnałohijach i bijachimii. Usio heta zabiaśpiečvaje mahčymaść raspracoŭki vakcyn», — skazaŭ Andrej Hančaroŭ.
Jon taksama rastłumačyŭ, čamu nieabchodny centr virusałohii.
«Viadoma, padšturchnuła da hetaha pandemija COVID-19. Rost kolkaści nasielnictva na ziamli, ciesnata nasielnictva, mahčymaść chutkaha pieramiaščeńnia, rost kantaktaŭ čałavieka ź dzikaj pryrodaj — usio heta zabiaśpiečvaje źjaŭleńnie ŭsio novych niebiaśpiečnych uzbudžalnikaŭ. Pandemija, ź jakoj my sutyknulisia, — heta daloka nie najhoršy varyjant, isnuje vialikaja kolkaść inšych virusaŭ, jakija zdolnyja nanieści bolšuju škodu. Virusy treba daśledavać i stvarać suprać ich srodki dla prafiłaktyki. Tolki majučy ŭ krainie taki centr, što zdolny raspracavać vakcynu suprać luboj infiekcyi ŭ samyja karotkija terminy, možna zabiaśpiečyć infiekcyjnuju biaśpieku krainy. My da hetaha absalutna hatovyja», — padkreśliŭ dyrektar Instytuta.
Navukoŭcy ciapier raspracoŭvajuć dźvie vakcyny suprać aktualnych zachvorvańniaŭ. «Suprać jakich mienavita — zachavajem intryhu. Da kanca hoda spadziajomsia pakazać hramadskaści pieršyja pratatypy hetych vakcyn», — anansavaŭ Andrej Hančaroŭ.
