Apple prezientavała novyja akulary źmiašanaj realnaści. U ich abjadnajucca virtualny i realny śviety
Rynak hety hadžet čakaŭ ź vialikim nieciarpieńniem 10 hadoŭ.
Fota: Apple
Kampanija Apple prezientavała novyja akulary dapoŭnienaj (abo źmiašanaj) realnaści Apple Vision Pro. Heta pieršy bujny hadžet, vypuščany technahihantam amal za dziesiacihodździe, i rynak čakaŭ jaho ź vialikim nieciarpieńniem, piša Bi-bi-si.
Pa słovach hienieralnaha dyrektara Apple Cima Kuka, novaja harnitura «biezdakorna spałučaje ŭ sabie realny śviet i virtualny śviet».
Pradukt prezientavali na štohadovaj kanfierencyi dla raspracoŭščykaŭ Worldwide Developers Conference — 2023.
Akramia akularaŭ, Apple taksama prapanavała abnaŭleńni dla MacBook Air i anansavała novuju apieracyjnuju sistemu iOS 17.
Łyžnyja akulary
Apple Vision Pro nie padobnyja da anałahičnych hadžetaŭ virtualnaj realnaści i chutčej nahadvajuć paru łyžnych akularaŭ.
Jany raźličanyja na dźvie hadziny aŭtanomnaj pracy.
U apisańni pryncypu pracy pryłady Apple vykarystoŭvaje słovy «dapoŭnienaja» abo «źmiašanaja» realnaść.
Jana nakładvaje virtualnyja abjekty na navakolny śviet, dazvalajučy nam złučać realnaść vakoł nas ź virtualnym śvietam.
Karystalniki mohuć atrymlivać dostup da roznych dadatkaŭ, hladzieć filmy i składać dakumienty ŭ virtualnaj prastory.
Padčas prezientacyi Cim Kuk patłumačyŭ, što novaja pryłada dazvolić karystalnikam «bačyć, čuć i ŭzajemadziejničać ź ličbavym kantentam hetak ža, jak byccam heta adbyvajecca ŭ vašaj fizičnaj prastory».
Kirujucca akulary z dapamohaj ruk, a taksama hołasam i vačyma.
Darahoŭla, niedachopy, kankurencyja
Pieršuju partyju Apple Vision Pro płanujuć vypuścić u ZŠA ŭ pačatku nastupnaha hoda.
Adnak u ekśpiertaŭ jość sumnievy, što taki pradukt moža zacikavić šyroki rynak.
Vierahodna, jakraz tamu padčas dakłada pradstaŭnikoŭ Apple na Worldwide Developers Conference — 2023 akcyi kampanii trochi ŭpali ŭ canie.
Mnohich biantežyć zajaŭlenaja cana Apple Vision Pro. Para akularaŭ abydziecca pakupniku ŭ 3499 dalaraŭ — heta značna vyšej, čym u anałahičnych praduktaŭ na rynku.
Staršy redaktar profilnaha vydańnia MacRumors Chartł Čarltan nie ŭpeŭnieny, što navinka ź lohkaściu zavajuje šyrokuju publiku.
«Spačatku pradukt nie spadabajecca masavamu spažyŭcu praź jaho nadzvyčaj vysoki košt i niepasrednyja niedachopy, ułaścivyja pryładam pieršaha pakaleńnia. Adzin ź ich — asobny drotavy akumulatar», — ličyć Čarltan.
Adnak, nahadaŭ jon, mnohija pradukty Apple na pačatku ŭsprymalisia skieptyčna, i ŭ kampanii jość vialiki dośvied u pieraadoleńni hetaha barjera.
Prezientacyja Apple prajšła praz tydzień paśla taho, jak Meta i Lenovo abviaścili pra stvareńnie novych viersij svaich isnych harnitur virtualnaj realnaści, jakija, adnak, pakul nie mohuć nakładvać abjekty na malunak realnaha śvietu.
Meta ŭkłała značnyja srodki ŭ raspracoŭki źmiašanaj realnaści, ale ciapier hety siektar maje ciažkaści.
Pa danych International Data Corporation, u minułym hodzie suśvietnyja prodažy na rynku hadžetaŭ virtualnaj realnaści ŭpali na 54%.
«Za apošnija niekalki hadoŭ ahulnaja prastora AR/VR była trochi pierahružanaja mietasuśvietam i padobnymi štukami, — ličyć ekśpiert Forrester Research Tomas Chasan. — Tamu ja dumaju, što [pryniaćcie publikaj novaha praduktu Apple] zojmie trochi bolš času».
iOS 17
Akramia Vision Pro, Apple taksama prezientavała iOS17 — apošniuju viersiju apieracyjnaj sistemy iPhone.
Abnaŭleńni ŭklučajuć u siabie mahčymaść piersanalizavać ekran pryłady pad zapyty karystalnikaŭ, rasšyfroŭku hałasavych paviedamleńniaŭ u tekstavy farmat z dapamohaj dadatku iMessage i mnohaje inšaje.
Asabliva vyłučajucca dźvie novyja funkcyi: NameDrop, z dapamohaj jakoj možna budzie abmieńvacca fatahrafijami, videa i kantaktami, prosta dakranuŭšysia pryładami, i Check-In — aŭtamatyčnaje apaviaščeńnie abranaha karystalnikam koła asob pra toje, što jon viarnuŭsia ci nie viarnuŭsia dadomu ŭ vyznačany čas.
Novaja apieracyjnaja sistema budzie dastupnaja vosieńniu 2023 hoda.
