Na ekranach — «Rusałačka». Ci ŭdałosia sučasnaje pieraasensavańnie?
Režysior Rob Maršał zrabiŭ svaju interpretacyju kazki dackaha piśmieńnika Hansa Chryścijana Andersiena i viadomaha dysnejeŭskaha multfilma 1989 hoda. Atrymaŭsia animacyjny bajavik z hierojami roznych koleraŭ skury i nacyjanalnaściaŭ.
Choli Bejli ŭ fentezijnym miuzikle 2023 hoda «Rusałačka». Fota: Walt Disney Studios
Novaja «Rusałačka» pačałasia sa skandalnaha vybaru na hałoŭnuju rolu ciemnaskuraj śpiavački Choli Bejli. Vonkavyja adroźnieńni Bejli ad aryhinalnaha piersanaža z błakitnymi vačyma i śvietłaj skuraj vyklikali pratest u karystalnikaŭ internetu. Źjaviłasia čarada niehatyŭnych publikacyj z cheštehami #NotMyAriel i #NotMyMermaid.
Adnak vybar Choli Bejli na hałoŭnuju rolu, jak i jaje ihra, adna z najlepšych rečaŭ u hetym filmie. Akciory druhoha płanu taksama na vyšyni. Techničnaja kamanda vielmi dobra pieradała płavańnie hierojaŭ u padvodnym carstvie: sačyć za vizualnymi efiektami, jakija supravadžajuć płavańnie piersanažaŭ, biaskonca zachaplalna.
Kali vy zabylisia, što dziejecca ŭ siužecie, ścisła nahadajem: rusałačka Aryel prahnie adkryć dla siabie śviet nad moram. Jana źbiraje rečy, jakija padajuć u akijan źvierchu, i ŭvieś čas molić svajho baćku, karala, dazvolić joj daśledavać ziamlu. Karol Tryton suprać usiaho, što źviazana ź ludźmi, bo jaho žonka była imi zabitaja. Nasupierak voli baćki Aryel zaklučaje ździełku z marskoj viadźmarkaj Ursułaj, pavodle jakoj abmianiaje svoj hołas na čałaviečyja nohi, kab adkryć dla siabie śviet naviersie i ŭrazić maładoha prynca, jakoha jana kaliści dapamahła vyratavać.
Choli Bejli ŭ fentezijnym miuzikle 2023 hoda «Rusałačka». Fota: Walt Disney Studios
Adnak šmatrasavaja i multykulturnaja viersija daloka adyšła ad pieršapačatkovaj krynicy 1837 hoda — dackaj kazki, napisanaj Hansam Chryścijanam Andersienam. Mižrasavaja sumieś siaścior i ŭsiaho akciorskaha składu, adsyłki da žanočaj samadastatkovaści — usio kaža samo za siabie. Heta novaja norma.
Ale ci maje sens multykulturnaść u dačynieńni da samoha siužeta? Ci pieraasensoŭvajecca ŭžo viadomaja nam historyja ŭ niejkim novym rečyščy? Tut adkaz, chutčej, nie.
Pytańni krytykaŭ vyklikała taksama admova ad antrapamorfnych rys takich hierojaŭ, jak krab Siebaśćian i rybka Fłaŭnder, — jany nabližanyja da realnych žyvioł i praz heta, na žal, jak byccam stracili svaju pierakanaŭčaść. U dadatak «padvodnyja epizody» «Rusałački» vyhladajuć praźmierna «padvodnymi»: jany atrymalisia vielmi ćmianyja, choć, mahčyma, raźličanyja na peŭnuju jakaść ekrana ŭ kinateatry. Ale ž nie ŭsie buduć hladzieć hety film u kinazale.
Novaj «Rusałačcy» brakuje sapraŭdnaj mahii, niepadroblenaj viesiałości i ryzykoŭnaści, ułaścivych papiarednim viersijam. Adnak pry hetym heta vizualna dobry film z mocnym akciorskim składam, jon napoŭnieny dastatkovaj kolkaściu śmiechu, kab spadabacca dzieciam, i nie dać zasumavać darosłym.
Čytajcie jašče:
U Disney stvaryli štučny intelekt, jaki lohka «małodzić» abo «staryć» akcioraŭ
Pamior francuzski biznesmien, jaki staŭ pratatypam hałoŭnaha hieroja filma «1+1»
83-hadovy Al Pačyna zapatrabavaŭ ad 29-hadovaj kachanaj test na baćkoŭstva
