Łukašenka choča vybudavać z Rasijaj prastoru nakštałt Savieckaha Sajuza
Alaksandr Łukašenka 8 červienia sustreŭsia z sakratarami savietaŭ biaśpieki dziaržaŭ — siabroŭ Arhanizacyi Dahavora ab kalektyŭnaj biaśpiecy.
Alaksandr Łukašenka 8 červienia sustreŭsia z sakratarami savietaŭ biaśpieki dziaržaŭ — siabroŭ Arhanizacyi Dahavora ab kalektyŭnaj biaśpiecy
Na joj Łukašenka znoŭ raskazaŭ, što SND — u kole vorahaŭ, samy hałoŭny ź ich — heta ZŠA.
«Dla amierykancaŭ važna pastavić na kaleni Jeŭropu. Jany im pakažuć, što takoje ŭvodzić jeŭra suprać dalara. Heta taksama zrazumieła. I jeŭra pačało advajoŭvać u svoj čas miesca pad soncam. Heta amierykancam nie treba. A finansy — kryvianosnaja sistema».
Pavodle Łukašenki, praz heta ZŠA pačali cisnuć na Jeŭropu i ciapier chočuć raździalić jaje. «Adharadzić jaje ad nas. Ad Bałtyki da Čornaha mora praz Polšču, Ukrainu. Ź Biełaruśsiu nie atrymałasia: była zaduma hety sanitarny kardon pabudavać ad Smalenska i nižej na Bałtyku. Ale ciapier uzbrojvajuć Polšču i Ukrainu. Ale treba, kab Ukraina pieramahła. Heta ich załataja mara. Voś zaduma», — skazaŭ jon.
Łukašenka taksama padzialiŭsia svaim namieram prapanavać prezidentu Rasii vybudavać prahramu dziejańniaŭ, «svojeasablivy płan unutranaha raźvićcia terytoryj».
«Z dośviedu Savieckaha Sajuza vy pamiatajecie: my pad pryhniotam byli, nichto nas nie škadavaŭ, nas sprabavali zadušyć. Ale my, u niejkim sensie zamknionyja ŭ svaich miežach, vydatna pracavali, byli samadastatkovymi. Treba razumieć, što i Biełaruś, i Rasija — my pavinny hetuju prastoru adbudavać, vybudavać płany, kab my mahli być samadastatkovymi, kab nas praz dalar, jašče niejkuju valutu nie stavili pastajanna na kaleni. Nam treba vypracavać płan unutranaha raźvićcia našaj prastory, pierš za ŭsio Rasii i Biełarusi, raz užo my ŭ adnoj łodcy», — skazaŭ Łukašenka.
Siońnia stała viadoma, što zaŭtra Łukašenka znoŭ lacić na sustreču z Pucinym.
