Ukrainski palityk Siarhiej Prytuła vystaviŭ patrabavańnie da Cichanoŭskaj
Papularny ŭkrainski televiadoŭca i palityk Siarhiej Prytuła vystupiŭ ź niečakanaj zajavaj, u jakoj paprasiŭ Śviatłanu Cichanoŭskuju dać adkaz na niekalki važnych dla ŭkraincaŭ pytańniaŭ.
Siarhiej Prytuła zaklikaŭ Śviatłanu Cichanoŭskuju adkazać na pytańnie ab vypłacie Ukrainie reparacyj. Skryn videa jutub-kanała Prytuły
U svaim jutub-kanale Siarhiej Prytuła raźmiaściŭ videa, u jakim adznačyŭ, što
va Ukrainie šmat razmoŭ pra Rasiju, jaje budučaje paražeńnie, pra vypłatu joju reparacyj, ale pry hetym zabyvajucca pra Biełaruś. I darma. Na dumku palityka, jość peŭnaja schavanaja ryzyka. I jon by chacieŭ aktualizavać temu Biełarusi, kab «jana visieła ŭ pavietry i nie źnikała z haryzontu».
Siarhiej Prytuła zaŭvažaje, što lubaja kraina, jakaja dałučyłasia da ahresii Rasii suprać Ukrainy, pavinna być pakaranaja, pavinna nieści adkaznaść i zapłacić pa rachunkach. Adnosna ich pavinien dziejničać pryncyp niepaźbiežnaści pakarańnia za dałučanaść da zabojstva hramadzian Ukrainy, źniščeńnia haradoŭ i viosak, razbureńnie infrastruktury.
«Chto i kolki zapłacić, potym z kalkulatarami ŭ rukach paličać śpiecyjalna navučanyja ludzi», — zajaŭlaje palityk.
Siarod krain, jakija pavinny buduć zapłacić, Prytuła nazyvaje Rasiju, Iran i Biełaruś.
Adnosna apošniaj, zaŭvažaje palityk, uźnikaje adzin cikavy momant, jaki moža ŭsio nivielavać. Uvieś cyvilizavany śviet razam z Ukrainaj ciapierašniaje kiraŭnictva Biełarusi nie pryznaŭ. Łukašenka nielehitymny. Padstavaju dla hetaha, nahadvaje Prytuła, stali padziei leta 2020 hoda.
Palityk zaŭvažaje, što rana ci pozna ŭ Biełarusi adbudziecca źmiena ŭłady, i dyktatarski režym padzie. Jon prapanuje dapuścić, što ŭ vyniku peŭnych hieapalityčnych pracesaŭ da ŭłady ŭ Biełarusi prychodzić libieralna-demakratyčnaja apazicyja.
«Ale ŭ toj momant, jak Ukraina budzie čakać ad Biełarusi satysfakcyi ŭ finansavym vymiareńni za ŭdzieł u vajennaj ahresii suprać našaj dziaržavy, całkam imavierna, što nie niejkaja ŭmoŭnaja, a kankretnaja spadarynia Cichanoŭskaja vyjdzie na trybunu i skaža: «Šanoŭnyja, biełarusy skinuli ź siabie jarmo dyktatara Łukašenki. Nam vielmi škada, što naša dziaržava stała płacdarmam dla rasijskich vojskaŭ, ale ŭ hetym niama viny biełaruskaha naroda.
Adkaznaść całkam lažyć na papiaredniaj uładzie, jakaja stała maryjanietkaj Kramla. I ŭvohule naša kraina pad akupacyjaj RF. Tamu my, Biełaruś, takaja ž achviara, jak i Ukraina. I z nas, jak kažuć, «sprosu niet».
Prytuła zaŭvažaje, što z usioj pavahaj stavicca da chłopcaŭ i dziaŭčat z pałka Kalinoŭskaha, da biełarusaŭ, jakija vałancioryli i danacili na karyść Ukrainy. Ale, na jaho dumku, «indyvidualnyja podźvihi nie mohuć pierakreślić jurydyčnuju adkaznaść krainy-suzasnavalnicy AAN».
Palityk nahadvaje, što ź Biełarusi vylatali samaloty, jakija bambili Ukrainu, zapuskalisia rakiety pa ŭkrainskich haradach, kałonami zachodzili rasijskija vojski, jakija ŭčyniali hienacyd u Bučy, Irpieni i Baradziancy.
Palityk zajaŭlaje: «Dziaržava Biełaruś niasie adkaznaść za śmierci tysiač ukraincaŭ, za zrujnavanaje žyćcio miljonaŭ ukraincaŭ, za źniščanyja harady i vioski. Ukrainski parłamient pavinien nieadkładna pryznać Biełaruś krainaj-ahresaram.
A biełaruskaja ŭłada ŭ vyhnańni pavinna dać ukraincam adkazy na prostyja pytańni. Ci ŭśviedamlajecie vy adkaznaść za toje, što vaša dziaržava zrabiła z našaj? Ci hatovyja vy harantavać ukraincam kampiensacyju strat i spłačvać reparacyi razam z RF?»
Hetyja kankretnyja pytańni Prytuła adrasuje Cichanoŭskaj i zaŭvažaje, što «adkazy na ich daduć ukraincam dakładnaje razumieńnie, jak dalej vybudoŭvać dyjałoh i z vami, i z vašaj krainaj u cełym».
U kancy Siarhiej Prytuła adznačaje, što ŭkraincy schilajuć hałovy pierad śvietłaj pamiaćciu kožnaha biełarusa, jaki pakłaŭ žyćcio ŭ vajnie z Rasijaj za niezaležnaść Ukrainy i Biełarusi.
«Ale ŭsio ž taki ŭ nas jość šmat pytańniaŭ da dziesiacimiljonnaj krainy, jakaja dazvoliła skarystacca saboju dla taho, kab rasijanie mahli zabivać ukraincaŭ. Dajcie adkazy na hetyja pytańni».
Čytajcie jašče:
Maraviecki: Polšča nie dapuścić prymusovaha pierasialeńnia mihrantaŭ
Padalak zajaviŭ, što Maskva «adbivaje hłabalny nastup, jakoha jašče niama»
vielmi žadajecie bačyć biełarusaŭ žachlivym bydłam?
nie atrymajecca! statystyka suprać vas!
Padabajecca im Cichanoŭskaja - ci nie, nie važna, heta demakratyčny vybar 70% biełarusaŭ (vyzvalić palitviaźniaŭ i pravieści novyja vybary) i inšaha lehitymnyaha pradstaŭnika ŭ biełarusaŭ u śviecie zaraz niama
Kali žadajecie dakapacca da Cichanoŭskaj - značyć vy suprać demakratyi ŭ Biełarusi.
I DLA CIABIE PRYTUŁA, ty ž da svajho Vałodzi nie źviartaješsia "PAN ZIALENSKIJ"
Dyk ź jakoha tabie prezident Biełarusi stała "pani Cichanoŭskaja"
Dla ciabie heta Śviatłana Hieorhijeŭna
Ci ty tak nienavidziš što ažno kavierkaješ imiony jak 5kłaśnik?????