U Viciebsku znoŭ viarnulisia da temy budaŭnictva kopii połackaha Safijskaha sabora
U Viciebsku rychtujecca hramadskaje abmierkavańnie spravazdačy ab acency ŭździejańnia na navakolnaje asiarodździe budaŭnictva Safijskaha sabora na bierazie Dźviny la mosta Błachina, paviedamlajuć «Narodnyja naviny Viciebska».
Vid na budučy Safijski sabor u Viciebsku z boku Dźviny
Paśla taho, jak u 2016 hodzie haradžanam udałosia praduchilić vysiečku dreŭ u parku Partyzanskaj słavy pad budaŭničuju placoŭku kopii połackaha Safijskaha sabora, inicyjatyva pabudovy hetaj pravasłaŭnaj carkvy zahłuchła na niekalki hadoŭ.
Praz try hady tahačasny kiraŭnik Viciebska Viktar Nikałajkin paviedamiŭ haradžanam, što kopiju chrama źbirajucca hetym razam uzvodzić na placoŭcy pamiž handlovym centram «Biełaruś» i byłymi jaŭrejskimi mohiłkami.
Vid na budučy Safijski sabor u Viciebsku z paŭdniovaha boku
U 2020 hodzie prajšło abmierkavańnie prajekta budaŭnictva. Jak akazałasia, budynak sabora pa płoščy mieŭsia być jašče bolšym, čym toj, što płanavaŭsia ŭ parku. U krasaviku 2021 hoda Viciebsk upieršyniu naviedaŭ mitrapalit Vienijamin, jaki aśviaciŭ śpiecyjalny znak na miescy budučaj Nižniaj carkvy Safijskaha sabora na bierazie Dźviny.
Aśviačeńnie kamienia na miescy budaŭnictva sabora
Na hetym sprava z budaŭnictvam kopii staražytnaha sabora nibyta zacichła. Ciapier, adnak, vyśviatlajecca, što ŭ krasaviku ŭsiaho za dva tydni była padrychtavana spravazdača ab acency ŭździejańnia na navakolnaje asiarodździe hetaha abjekta budaŭnictva.
Pavodle paviedamleńnia harvykankama, na hramadskaje abmierkavańnie spravazdaču płanujuć vynieści 21 červienia, zaŭvahi buduć prymać ciaham miesiaca. Zatym dajecca jašče miesiac na dapracoŭku spravazdačy zhodna z zaŭvahami. A ŭ žniŭni-vieraśni spravazdača ŭ składzie pieradprajektnaj (pieradynviestycyjnaj), prajektnaj dakumientacyi budzie prachodzić dziaržaŭnuju ekałahičnuju ekśpiertyzu.
Čytajcie taksama:
Pahladzicie, jak ciapier vyhladaje 200-hadovaja carkva, u jakoj byvaŭ Ihnat Damiejka
Teołah patłumačyła, čamu relihija stała dla Łukašenki važniejšaj za sport
