Bolš nie buduć pravodzić litaraturny fiestyval u honar Niny Maciaš
U litaraturnych kołach Bieraściejščyny abmiarkoŭvajecca navina, što litaraturna-piesienny fiestyval u Biełaaziorsku «Babina leta ź Ninaj Maciaš», jaki štohod źbiraŭ prychilnikaŭ tvorčaści paetki z usioj Biełarusi, a taksama tvorcaŭ-siabroŭ Niny Jazepaŭny, bolš pravodzicca nie budzie, piša Bellit.info.
Nina Maciaš
Fiestyval byŭ zasnavany ŭ 2010 hodzie i tradycyjna prachodziŭ u Domie kultury Biełaaziorska, z udziełam miascovych uładaŭ, pradstaŭnikoŭ škoł i biblijatek horada.
Na paetyčnyja čytańni štohod admysłova pryjazdžali litaratary ź Bieraścia i rajonnych centraŭ vobłaści, a taksama paety i pierakładčyki ź Minska, Hrodna. Na «Babinym lecie» vystupali Raisa Baravikova, Anatol Viarcinski, Aleś Kasko, Aleś Razanaŭ, Michaś Skobła i dziasiatki inšych paetaŭ i piśmieńnikaŭ.
«Babina leta ź Ninaj Maciaš» tradycyjna pravodziłasia ŭ dzień jaje naradžeńnia, 20 vieraśnia. Akurat sioleta paetka śviatkavała b svajo 80-hodździe.
Nina Maciaš (1943 — 2008) — paetka, pierakładčyca. Skončyła Biarozaŭskuju siaredniuju škołu (1960), pastupiła na fakultet francuzskaj movy Minskaha dziaržaŭnaha piedahahičnaha instytuta zamiežnych moŭ. Z-za chvaroby vymušana była ŭziać akademičny adpačynak (skončyła instytut u 1966), paśla žyła ŭ Biełaaziorsku. Aŭtarka šmatlikich zbornikaŭ paezii, jakija atrymlivali dobryja vodhuki krytykaŭ.
Taksama pierakładała ź niamieckaj, polskaj, francuzskaj moŭ. U jaje pierakładzie vyjšli knižki Žorža Simienona «Pieršaja sprava Miehre», Antuana de Sient-Ekziupiery «Płanieta ludziej» i «Maleńki prync», navieły Hi de Mapasana, paema «Marusia Čuraj» Liny Kastenka i inšyja.
Čytajcie taksama:
Łarysa Hienijuš źnikła z naboru zakładak «Piśmieńniki XX stahodździa» na OZ.by
Knihi Hienijuš, Arsieńnievaj i Niaklajeva trapili ŭ śpis ekstremisckich materyjałaŭ
Uładzimir Niaklajeŭ adreahavaŭ na toje, što knihu jaho vybranych tvoraŭ pryznali ekstremisckaj
