U «Hrodnaenierha» praciahvajucca začystki supracoŭnikaŭ. Zvalniajuć navat redkich śpiecyjalistaŭ
Jak stała viadoma «Našaj Nivie», na Hrodzienskaj TEC-2 RUP «Hrodnaenierha» praciahvajucca masavyja zvalnieńni z palityčnych matyvaŭ.
Ilustracyjny zdymak. Fota: RUP «Hrodnaenierha»
Pavodle infarmacyi krynicy, znajomaj ź situacyjaj, na pradpryjemstva niadaŭna byŭ spuščany śpis z bolš jak 20 proźviščami ludziej, jakija najbližejšym časam musiać być zvolnienyja z pracy.
«Ludziej sa śpisa vyklikaje da sabie načalstva, dzie razam ź miascovym kadebešnikam davodzić da viedama, što «vam treba vyzvalić miesca». Kankretnych terminaŭ nie nazyvajuć, ale rajać nie zaciahvać hetaha pracesu», — kaža surazmoŭca.
Pavodle jaho słoŭ, ludziej sa śpisa «prosiać» zvolnicca, nie zvažajučy na termin da zakančeńnia kantrakta i dośvied pracy na pradpryjemstvie.
«Prafiesijnyja jakaści taksama nie majuć nijakaha značeńnia. Dajšło da taho, što zvalnieńnie adnaho čałavieka vymušana adkłała samo kiraŭnictva, bo zamianić jaho niama kamu. Ale heta nie aznačaje, što jaho pakinuć. Spačatku skazali nie zaciahvać sa zvalnieńniem, a potym paviedamili, što možna nie śpiašacca», — kaža surazmoviec.
«Zvolnicca prapanujuć na pahadnieńnie bakoŭ. Nakolki ja viedaju, nichto asabliva nie piarečyć i nie namahajecca trymacca za miesca, bo heta vidavočna nie maje sensu. Kali ad «niadobranadziejnaha» supracoŭnika treba pazbavicca, to jany znojduć, jak heta zrabić», — upeŭnieny surazmoŭca.
Što tyčycca «niadobranadziejnaści», to, pavodle słoŭ surazmoŭcy, z časam dla taho, kab trapić u taki śpis, treba ŭsio mienš padstaŭ.
«U nas heta ŭžo nie pieršaja chvala zvalnieńniaŭ za padziei 2020 hoda. Ale kali spačatku zvalniali tolki samych aktyŭnych, chto mieŭ štrafy za ŭdzieł u akcyjach ci za reposty, to ciapier kapajuć hłybiej. Ciapier vyhladaje, što im dastatkova taho, što čałaviek pakidaŭ svaje podpisy za vyłučeńnie alternatyŭnych kandydataŭ.
Taksama nie vyklučaju, što častka ludziej mahła patrapić u śpis praz karty palaka. Nie ŭsie hatovyja ad ich admovicca, bo ludzi razumiejuć, što jana jašče moža spatrebicca ŭ žyćci», — kaža surazmoŭca.
Čytajcie taksama:
Źniali dyrektaraŭ škoł, zabaranili pisać pra leta. Jak u Hrodnie zmahajucca z pastupleńniem vypusknikoŭ za miažu
Stali viadomyja maštaby abłavy na «Biełhipraziem». Pakaranyja i zvolnienyja nie mienš za dziesiać supracoŭnikaŭ
Hałoŭnym dyryžoram minskaha Opiernaha staŭ rasijanin. Svaich pazvalniali za palityku
Ułady pryznali deficyt pracaŭnikoŭ u Biełarusi i znajšli rašeńnie
