U Biełarusi likvidujuć hramadskaje abjadnańnie «Dzieci Čarnobyla»
Minski haradski sud 4 kastryčnika razhledzić iskavuju zajavu Ministerstva justycyi ab likvidacyi hramadskaha abjadnańnia «Biełaruski kamitet «Dzieci Čarnobyla», jakoje dziasiatki hadoŭ dapamahała paciarpiełym ad radyjacyi.
16-hadovaja Śviatłana Pilipčuk (Cichanoŭskaja) u Irłandyi, kudy patrapiła ŭ ramkach prahramy dapamohi paciarpiełym ad čarnobylskaj katastrofy. Fota: fejsbuk Tomaša Sulimy
Infarmacyju pra heta zaŭvažyła «Radyjo Svaboda» na partale elektronnaha sudavodstva.
HA «Biełaruski kamitet «Dzieci Čarnobyla» zasnavanaja ŭ 1986 hodzie paśla avaryi na Čarnobylskaj atamnaj elektrastancyi, nahadvaje BPN.
Metami arhanizacyi źjaŭlajucca abarona fizičnaha i psichičnaha zdaroŭja, pravoŭ i intaresaŭ dziaciej Biełarusi, supracoŭnictva z navukovymi, miedycynskimi i hramadskimi arhanizacyjami roznych krain, ustojlivaje raźvićcio «čarnobylskich rehijonaŭ», miedycynskaje abśledavańnie dziaciej z terytoryj, jakija paciarpieli ad avaryi na ČAES.
Śviatłana Cichanoŭskaja ź irłandskaj siamjoj, jakaja prymała jaje pa prahramie «Dzieci Čarnobyla». Fota: tvitar Cichanoŭskaj
Pa prahramie «Dzieci Čarnobyla» maładych biełarusaŭ z terytoryj, jakija źviedali najbolšaje radyjeaktyŭnaje zabrudžvańnie, vyvozili na azdaraŭleńnie ŭ krainy Jeŭropy. Siarod ich była i, naprykład, Śviatłana Pilipčuk (ciapier Cichanoŭskaja), jakaja va ŭzroście 12 hadoŭ pa hetaj prahramie trapiła ŭ Irłandyju. Paśla jana šmat hadoŭ pryjazdžała siudy ŭletku.
U červieni italjanskaje vydańnie Redattore sociale paviedamiła, što na praciahu troch apošnich hadoŭ nie ažyćciaŭlajucca pajezdki biełaruskich dziaciej u hetuju krainu na azdaraŭleńnie. Spačatku hetamu pieraškadžała pandemija karanavirusa, a zatym — spynieńnie avijaznosin pamiž Biełaruśsiu i ES z pryčyny sankcyj. Raniej dzieci ź Biełarusi vyjazdžali ŭ Italiju padčas školnych kanikuł na praciahu tryccaci hadoŭ.
Adznačałasia, što sioleta italjanskija ŭłady atrymali dazvoł na arhanizacyju adpaviednych rejsaŭ kampanijaj «Biełavija», adnak biełaruski bok zabłakavaŭ realizacyju prajekta.
Pavodle danych pravaabarončaj arhanizacyi Lawtrend, za pieryjad paśla prezidenckich vybaraŭ 2020 hoda i da kanca žniŭnia 2023-ha ŭ Biełarusi likvidavana nie mienš za 1407 niekamiercyjnych arhanizacyj (NKA) — abjadnańniaŭ, prafsajuzaŭ, fondaŭ, niedziaržaŭnych ustanoŭ i asacyjacyj.
Čytajcie taksama:
Viarchoŭny sud likvidavaŭ Biełaruskuju sacyjał-demakratyčnuju partyju (Hramada)
Miniust likviduje SaveUs — arhanizacyju dapamohi biazdomnym žyviołam
Z 2020 hoda ŭ Biełarusi likvidavali nie mienš za 1372 niekamiercyjnyja arhanizacyi — pravaabaroncy
