Biełaruska ŭ mižnarodnym adbory praryvajecca ŭ K-pop-hurt
Biełaruska Ilija prajšła jašče adzin etap adboru ŭ dziavočy hurt, arhanizavanaha bujnymi hukazapisvalnymi kampanijami — paŭdniovakarejskaj Hybe Corp. i amierykanskaj Geffen Records. Pra heta piša vydańnie «Biełaruś i mir».
Biełaruska Ilija, jakaja prachodzić adbor u Dream Academy. Fota: Hybe X Geffen
Hybe Corporation zapisvaŭ, naprykład, zvyšpapularny karejski bojs-bend BTS, čyje fanaty składajuć adzin z najbujniejšych fendomaŭ u śviecie.
K-pop (karejski pop) uźnik u Paŭdniovaj Karei spačatku jak prosta muzyčny žanr, jaki ŭvabraŭ u siabie elemienty zachodniaha elektrapopa, chip-chopa, tancavalnaj muzyki i sučasnaha rytm-n-bluza, ale siońnia jon pieratvaryŭsia ŭ maštabnuju muzyčnuju subkulturu ź miljonami prychilnikaŭ va ŭsim śviecie.
Maštabny prajekt adboru The Debut: Dream Academy ŭ žanočy K-pop-hurt doŭžycca ŭžo treci hod. Mienavita ŭ čas pieršaj kampanii byŭ stvorany hurt BTS, a druhi adznačyŭsia pracaj z Džonam Lenanam, Donaj Samer, Ełtanam Džonam, Šer i inšymi zorkami.
Udzielnic u hetym adbory padzialili na čatyry kamandy, dźvie vakalnyja i dźvie tancavalnyja, i dali pieršaje zadańnie, kab dziaŭčaty mahli pakazać svoj talent. Paralelna ŭ sacsietkach išło hałasavańnie zaŭziataraŭ.
Emblema amierykana-karejskaha prajekta Dream Academy i biełaruska Ilija, jakaja prachodzić tudy adbor. Fota: Hybe X Geffen
Ilija trapiła ŭ hrupu vakalistak z Karli, Leksi, Bruklin i Manon. Jany vykanali kavier-viersiju Bili Ajliš na pieśniu Robin Dancing on my own. Praŭda, biełaruscy, jak i jašče šerahu ŭdzielnic, dastaŭsia tolki adzin solny radok.
Tym časam šmatdzionnaje hałasavańnie zaviaršyłasia takim čynam, što naša suajčyńnica apynułasia na 16 miescy.
Pavodle pravił konkursu, na hetym etapie adboru z 20 dziaŭčat musiła zastacca 18. Pry hetym udzielnicy, jakija zaniali pa vynikach fanackaha hałasavańnia pieršyja šeść pazicyj, atrymlivali «imunitet».
Vyniki byli prezientavanyja kankursantkam u vielmi dramatyčnaj maniery. Na stale lažała 18 kanviertaŭ, i pa čarzie nazyvalisia imiony tych, chto prajšoŭ u nastupny etap.
Udzielnicy amierykana-karejskaha prajekta Dream Academy, adabranyja dla navučańnia. Fota: Hybe X Geffen
Urešcie Ilija zastałasia ŭ liku apošnich troch dziaŭčat, čyj los jašče nie byŭ raskryty. I ŭsio ž mienavita biełaruscy ŭśmichnułasia ŭdača: paśla doŭhaj paŭzy było nazvana jaje imia.
Ciapier udzielnicy adboru adpravilisia ŭ Paŭdniovuju Kareju dla prachodžańnia nastupnaha etapu. Siarod inšych mierapryjemstvaŭ 4 kastryčnika ich čakaje sustreča z fanatami ŭ Sieule. A chto pieraadoleje novaje vyprabavańnie, stanie viadoma 9 kastryčnika.
Pra biełarusku, jakaja trapiła ŭ lik finalistak, viadoma mała. Jak vyśvietliła «Zierkało», dziaŭčynie 21 hod, jaje staronka ŭ TikTok z vakalnymi zapisami maje 2,9 młn padpisčykaŭ i 91,1 młn łajkaŭ. Pieśni jana vykonvaje ŭ asnoŭnym na anhlijskaj movie, ale paviedamlaje, što vałodaje taksama ruskaj, ispanskaj i trochi karejskaj movami. Na niekatorych videa joj padpiavaje maci, u jakoj taksama dobry hołas. U Instagram dziaŭčyna piša, što padtrymlivaje Ukrainu.
