Siońnia ŭ «Anhlijskim kvartale» pačali pradavać kvatery. Čarha pa ich źjaviłasia ŭžo ŭ piatnicu
«Anhlijski kvartał», jaki vyras u Malinaŭcy namahańniami MAPIDa, upieršyniu ŭzrušyŭ minčan jašče ŭ 2020 hodzie, kali byli dabudavany pieršyja trochpaviarchovyja damy. Viadoma, nie abyšłosia i biez prablem: u niekatorych kvaterach pramiarzali ścieny. Zabudoŭščyk uličyŭ pamyłki i dva nastupnyja damy ŭzvodziŭ užo pa novym prajekcie. Siońnia ŭ ich pačali pradavać kvatery. Niahledziačy na nie samy nizki košt «kvadrata» (ad $1424), užo ŭ piatnicu la ofisa MAPIDa pačała farmavacca čarha pa žyllo, piša Onliner.
Za jakimi kvaterami palavańnie?
Budynki, padobnyja da łondanskich taŭnchausaŭ, vyraśli na vulicy Jasienina. U kožnym — pa 4 padjezdy i 43 kvatery. Čystavoje azdableńnie maje tolki niekalki kvater — ich pieradaduć haradžanam, čyje damy iduć pad znos. U ich užo paklejeny špalery, lažyć linoleum. U abaviazkovy nabor uvachodziać santechnika, elektraplita, rakavina na kuchni.
A voś žyllo, jakoje pavinna pastupić u svabodny prodaž, idzie biez azdableńnia.
Samyja prastornyja kvatery, čatyrochpakajovyja, znachodziacca na pieršych pavierchach. Ich ahulnaja płošča — 99 «kvadrataŭ». Siudy ŭklučana jašče i dadatkovaje miesca zachoŭvańnia — tak zvanaja chałodnaja kładoŭka hłybinioj 3 mietry. Patrapić u jaje možna z łodžyi. Hety farmat žylla realizujuć praz aŭkcyjon. Pačatkovy košt kvadratnaha mietra — 4095 rubloŭ ($1261).
Na inšych uzroŭniach raźmiaščajucca trochpakajoŭki (76—78 «kvadrataŭ»), dvuchpakajoŭki (58—60) i adnapakajoŭki (40—44). Stoli nievysokija — 2,54 mietra. Płaniroŭki nastupnaha typu: žyłyja pakoi izalavanyja, kuchni ŭ asnoŭnym złučanyja z haścinymi. Sanvuzły najčaściej paasobnyja, sumieščanyja jość tolki ŭ adnapakajoŭkach.
Što tyčycca cen, to cana «kvadrata» ŭ adnapakajoŭkach — 4740 rubloŭ (abo $1460 pa kursie), u dvuchpakajoŭkach — 4725 rubloŭ (prykładna $1455), u trochpakajoŭkach — 4625 rubloŭ ($1424).
Piatničnaja čarha
Užo ŭ piatnicu ŭviečary na parkoŭcy pierad ofisam MAPIDa było zaŭvažana niekalki aŭtamabilaŭ. Vakoł ich pierastupała z nahi na nahu čałaviek dziesiać. Chtości pradbačliva ŭziaŭ z saboj składnoje kresła i tamu adčuvaŭ siabie kamfortniej u paraŭnańni ź inšymi. Chtości pryvałok ceły čamadan z arsienałam usiaho samaha nieabchodnaha: ad pleda da płanšeta. Uvohule, nastroj u prysutnych byŭ rašučy.
— Z ranicy było 1-2 čałavieki, astatnija padciahnulisia k abiedu, — uspomniła žančyna z papkaj u rukach. — My viedajem adno adnaho jašče ź pieršaha prahladu (zabudoŭščyk prapanoŭvaŭ ekskursii pa damach dla tych, chto zacikaviŭsia. — Zaŭv. Onlíner). Kaściak sfarmavaŭsia jašče ŭ aŭtorak — tut ludzi, jakija realna chočuć kvatery ŭ «Anhlijskim kvartale».
U piatnicu ŭ śpisach byŭ 21 čałaviek. Kožny nahledzieŭ sabie niešta svajo i pieražyvaŭ, kab zapavietnaja adna— / dvuch— / trochpakajoŭka nie dastałasia kamuści inšamu. Usio-tki dakładnaja kolkaść kvater, ź jakimi hatovy rasstacca zabudoŭščyk hetym razam, nikomu z prysutnych nie viadoma.
— A raptam samy ścipły i nieprykmietny čałaviek z čarhi zojdzie i kupić sabie 7-8 najlepšych kvater? My ž nie viedajem, u kaho jakija namiery, — zaŭvažyŭ mužčyna ŭ čornym.
Čarha nazyvaje siabie ludźmi, jakija šanujuć kamfort i stajać tut daloka nie z-za «smačnaha» koštu, a z-za mahčymaści vybaru. Bolšaść — žychary Malinaŭki, jakija pryvykli da hetaha rajona. Chacia znajšlisia achvotnyja navat ź inšych haradoŭ — z Mahilova, naprykład.
U čarzie jość i tyja, chto ŭžo kupiŭ žyllo ŭ pieršych damach kvartała, a ciapier pryhladajecca da jašče adnaho — užo dla svajakoŭ.
— Małapaviarchovaja zabudova, minimum susiedziaŭ. Usio cicha, spakojna. Dla kožnaj kvatery praduhledžana parkovačnaje miesca. Jość usia infrastruktura: mahaziny, paliklinika, škoła, dziciačy sad. Da mietro možna pieššu prahulacca… — pieraličyŭ plusy haradžanin u błakitnaj futbołcy.
