U Minadukacyi raspaviali, ci možna maładomu śpiecyjalistu pieraraźmierkavacca da IP
Načalnik hałoŭnaha ŭpraŭleńnia prafiesijnaj adukacyi Ministerstva adukacyi Biełarusi Siarhiej Piščoŭ raspavioŭ BiełTA pra toje, ci možna maładomu śpiecyjalistu pieraraźmierkavacca da indyvidualnaha pradprymalnika.
Adkazvajučy na pytańnie ab mahčymaści pieraraźmierkavańnia da indyvidualnaha pradprymalnika, Siarhiej Piščoŭ adznačyŭ, što zakanadaŭča heta nie zabaroniena.
«U nas jość bazavyja arhanizacyi — zakazčyki kadraŭ, jakija farmirujuć zakaz. Kožnaja ŭstanova adukacyi pierad zaćviardžeńniem biudžetnych ličbaŭ pryjomu daje pieralik zajavak ad arhanizacyj, jakim patrebnyja buduć śpiecyjalisty praz čatyry ci piać hadoŭ. Dyk voś, kali ŭ nas pry pieraraźmierkavańni jość patreba ŭ kadrach u bazavych arhanizacyj, to kamisija pa pieraraźmierkavańni budzie razhladać hetyja varyjanty ŭ pieršuju čarhu. Pryjarytet budzie za imi.
Kali zajavak ad hetych arhanizacyj nie budzie, to mahčyma pieraraźmierkavańnie i da indyvidualnaha pradprymalnika», — prainfarmavaŭ jon.
Samaj častaj pryčynaj pieraraźmierkavańnia ŭ achovie zdaroŭja, pa słovach načalnicy hałoŭnaha ŭpraŭleńnia arhanizacyjna-kadravaj raboty i prafiesijnaj adukacyi Ministerstva achovy zdaroŭja Volhi Kalupanavaj, źjaŭlajecca ŭstupleńnie ŭ šlub.
«U halinie achovy zdaroŭja pieraraźmierkavańnie maładych śpiecyjalistaŭ adbyvajecca hetak ža, jak i va ŭsich astatnich halinach. Čaściej za ŭsio pryčynaj pieraraźmierkavańnia źjaŭlajecca ŭstupleńnie ŭ šlub, taksama razhladajem žadańni pieraraźmierkavańnia z-za maralna-psichałahičnaha klimatu va ŭstanovie. Usie astatnija rečy možna źmianić.
Možna palepšyć materyjalnuju bazu dadzienaha śpiecyjalista, možna dać jamu lepšyja ŭmovy dla pražyvańnia, ale kali maralna-psichałahičny klimat skłaŭsia niaŭdała, to, na žal, my možam stracić maładoha śpiecyjalista. Byvajuć situacyi, kali z-za abstanoŭki ŭ kalektyvie jany kažuć, što pakryjuć srodki i syduć. My hetaha nie chočam, my zmahajemsia za kožnaha, chto pryjšoŭ da nas u halinu.
Byvajuć vypadki, kali my nie dajem zhody na pieraraźmierkavańnie. Časam byvaje situacyja, kali my zabiarem miedyka, i va ŭstanovie nie zastaniecca śpiecyjalista dadzienaha kirunku. Časam achvotnym pieraraźmierkavacca z-za ŭstupleńnia ŭ šlub davodzicca žyć na dva harady da momantu, pakul my nie ŭrehulujem situacyi. Takich pieraraźmierkavańniaŭ u nas byvaje kala 25%», — raspaviała Volha Kalupanava.
Čytajcie taksama:
Jak biełarusy prachodzili raźmierkavańnie i kasili ad adpracovak
