«Spraviadlivym u našym źmienlivym śviecie davodzicca niaprosta». Unučka Łukašenki raskazała pra siabie
Darja Łukašenka — studentka ekanamičnaha fakulteta, a taksama viadučaja na telekanale «Biełaruś 1» spartova-zabaŭlalnaha šou «Hieroi». U hetym hodzie vychodzić druhi siezon prahramy, dzie dziaŭčyna adna ź viadučych — jana vystupaje ŭ roli Justy. Hety piersanaž maje imia ad staražytnarymskaj bahini pravasudździa Justycyi, jakaja pavinna być spraviadlivaj da hulcoŭ. Napiaredadni siezona Darja dała niekalki karotkich intervju, piša «Kamsamołka».
Darja Łukašenka. Skryn videa
Darja Łukašenka — dačka siaredniaha syna Alaksandra Łukašenki Dźmitryja i jaho žonki Hanny, jakaja stała viadomaj jak aŭtarka słoŭ sumnieŭnych praŭładnych piesień.
U druhim siezonie Darja Łukašenka taksama budzie viadučaj. Z hetaj nahody Biełteleradyjokampanija ŭ adnoj z sacsietak raźmiaściła nievialikaje videa: Darja krychu raskazała pra siabie.
Adno z pytańniaŭ było ab tym, ci praŭda, što telebačańnie mianiaje ludziej.
— Rost svaich navykaŭ ja, biezumoŭna, adčuvaju, — adkazała Darja. — Heta, viadoma ž, dziakujučy telebačańniu, dziakujučy tamu, što mianie padtrymlivali, mianie matyvavali, mianie stymulavali ŭ dalejšym raźvivacca, jašče bolš układvać u svajo navučańnie ŭ hetaj śfiery. I, viadoma ž, vynik vidavočny, dumaju, što ja ŭžo našmat bolš upeŭniena adčuvaju siabie ŭ kadry.
Dziaŭčyna taksama padzialiłasia ŭražańniami ad zdymkaŭ telešou «Hieroi».
— Sam praces, viadoma ž, vałodaje čaroŭnaj i hajučaj ułaścivaściu, spačatku zdajecca, što sapraŭdy składana. Ale da kanca prajekta ty pačynaješ sumavać, što ŭsio heta zakančvajecca. Usie hetyja emocyi, supolnaje ź ludźmi, usia voś hetaja praca, jakaja, zdavałasia b, davoli ciažkaja, jana pieratvarajecca ŭ niejki stanoŭčy dośvied ź niejkimi sapraŭdy čaroŭnymi emocyjami ad adčuvańnia siabie datyčnaj voś da takoha prajekta.
U Darji taksama spytali, ci padobnyja Justa ŭ kadry i Darja ŭ žyćci?
— Nu, ja mahu skazać, što ja strymanaja ŭ emocyjach tolki ź nieznajomymi mnie ludźmi. I, jak i moj piersanaž u prajekcie, ja davoli spraviadlivy čałaviek. Heta, napeŭna, dźvie jakaści, jakija ŭva mnie prysutničajuć, jany supadajuć z majoj hierainiaj u prajekcie.
U intervju sb.by Darja dadała, što «spraviadlivym u našym źmienlivym śviecie časta davodzicca niaprosta, adnak heta adnaznačna stanoŭčaja rysa», jakoj jana vielmi hanarycca.
Darja kaža, što ŭ pracy na telebačańni joj dapamahali parady baćkoŭ.
— Usio ž adkaznaść vialikaja, uličvajučy, što dośviedu ŭ jakaści televiadučaj u mianie było zusim mała. Nie budu chavać: zajmałasia samakrytykaj, dzieści štości padkazvali i baćki. Dziakujučy paradam rodnych i zdymačnaj kamandy, ja zmahła pryraści ŭ śfiery i dasiahnuć taho, pra što raniej tolki maryła, — skazała Darja Łukašenka.
Jana kaža, što šmat čytaje i pracuje.
— U mianie niama času, kab biazdumna marnavać jaho ŭ sacsietkach i miesiendžarach. Addaju pieravahu kožny dzień pravodzić z karyściu. I tady mahčyma ŭsio, — raspaviała jana.
