«Na zadańnie łatvijskich śpiecsłužbaŭ rychtavała da viarboŭki biełaruskich vajskoŭcaŭ». U Minsku buduć sudzić hramadzianku Łatvii
U Minskim haradskim sudzie 29 vieraśnia pačnuć sudzić 57-hadovuju Ału Sakalenka. Jaje abvinavačvajuć u ahienturnaj dziejnaści (art. 358-1 KK). Sankcyja artykuła praduhledžvaje ad troch da siami hadoŭ źniavoleńnia. Spravu ŭ zakrytym režymie budzie razhladać Nastaśsia Papko, piša «Viasna».
Ała Sakalenka padčas dopytu. Skrynšot videa ATN
U kancy sakavika 2022 hoda źjaviłasia abviestka pra źniknieńnie dźviuch žančyn z Łatvii — Ały Sakalenka i Dzijany Bachmuty. Paviedamlałasia, što 28 sakavika jany nie viarnulisia ŭ Łatviju. Apošni raz žančyn bačyli 27 sakavika ŭ Homieli, dzie jany pavinny byli sieści na ciahnik. Paźniej stała viadoma, što Sakalenka zatrymali ŭ miežach kryminalnaj spravy za ahienturnuju dziejnaść na karyść Łatvii.
14 śniežnia 2022 hoda na dziaržaŭnym telebačańni vyjšaŭ film «Kontrraźviedka. Apieracyi biełaruskaha KDB suprać śpiecsłužbaŭ Zachadu i Ukrainy», dzie raspaviadałasia i pra spravu Ały Sakalenka.
U filmie jość kadry zatrymańnia hramadzianki Łatvii: na vulicy kala žančyny z čamadanam i pakietam spyniajecca ciomny mikraaŭtobus, adkul vybiahajuć piaciora mužčyn, u jakich na śpinach napisana «KHB». Adzin ź ich zdymaje ŭsio na videakamieru. Ału zaviali ŭ mikraaŭtobus. Ź inšaha boku taksama padjechała mašyna — u jaje supracoŭniki zaviali žančynu ŭ žoŭtaj kurtcy. Mierkavana, heta Dzijana Bachmuta, pra jakuju pisali ŭ abviestcy pra źniknieńnie — tam havaryłasia pra žančynu ŭ žoŭtaj kurtcy i sinich džynsach. Paźniej MZS Łatvii ŭdakładniła, što Dzijana ŭsio ž viarnułasia ŭ Łatviju.
«Da hetaha času [zatrymańnia] na jaje znajšli dastatkova dokazaŭ i materyjałaŭ. Sakalenka na zadańnie łatvijskich śpiecsłužbaŭ rychtavała da viarboŭki biełaruskich vajskoŭcaŭ, źbirała danyja, stvarała kampramietujučyja situacyi, jakija potym i słužać padstavaj dla viarboŭki zamiežnikami», — prakamientavali spravu Sakalenka ŭ filmie ATN.
Hramadzianka Łatvii ŭtrymlivajecca pad vartaj u SIZA. Pres-sakratar MZS zaznačyŭ, što ambasada Łatvii ŭ Viciebsku akazvaje joj konsulskuju dapamohu ŭ miežach mahčymaściaŭ.
Taksama ŭ viedamstvie adznačyli, što kolkaść zatrymanych hramadzian Łatvii rezka ŭzrasła paśla ŭviadzieńnia biaźvizavaha režymu 15 krasavika 2022 hoda, i nastojliva zaklikali hramadzian Łatvii nie jeździć u Biełaruś, bo mahčymaści Łatvii pa akazańni konsulskaj dapamohi zatrymanym hramadzianam abmiežavanyja.
