Finskija ŭłady płaciać ziemleŭładalnikam za dazvoł pabudavać umacavańni kala miažy z Rasijaj
U Finlandyi dziasiatki ŭładalnikaŭ učastkaŭ na miažy z Rasijaj zaklučyli tajemnyja pahadnieńni, jakija dazvolać finskim vajskoŭcam pravodzić fartyfikacyjnyja raboty na ich ziemlach, piša Bi-bi-si sa spasyłkaj na Helsingin Sanomat.
Ekskavatar pracuje na budaŭničaj placoŭcy pamiežnaj zaharody pamiž Finlandyjaj i Rasijaj niedaloka ad pamiežnaha punkta Piełkała ŭ Imatry (paŭdniova-ŭschodniaja Finlandyja). Fota: Sergei Grits / AP
Kali ziemleŭładalnik daje dazvoł na budaŭnictva ŭmacavańniaŭ na svaim učastku, jamu naležyć adnarazovaja vypłata 750 jeŭra. Paviedamić pra pačatak rabot ułady pavinny ŭsiaho za sutki.
Budaŭnictva na pryvatnaj ziamli pačniecca tolki tady, kali ŭźniknie «patencyjny kryzis», patłumačyŭ kiraŭnik adździeła zabieśpiačeńnia hatoŭnaści Sił abarony Finlandyi Saŭli Chonhista.
Zhodna z dakumientam, jaki padpisvajuć uładalniki ŭčastkaŭ, «pastanovu ab pačatku padrychtoŭki abarony prymaje kamandujučy ŭzbrojenymi siłami Finlandyi».
Pa danych vydańnia, takija pahadnieńni pačali zaklučać jašče šeść hadoŭ tamu, ale tolki ŭ mai 2022 hoda pra heta stała viadoma hramadskaści.
