Sotni tysiač palakaŭ vyjšli na demanstracyju apazicyi
Palaki vyjšli na demanstracyju apazycyi ŭ Varšavie 1 kastryčnika. Demanstracyja adbyvajecca za dva tydni da parłamienckich vybaraŭ, piša «Radyjo Svaboda».
Fota: AP Photo / Czarek Sokolowski
Apytańni hramadskaj dumki, jakija cytuje Reuters, pakazvajuć, što kiroŭnaja partyja «Prava i Spraviadlivaść» (PiS) moža pieramahčy na vybarach, ale pry hetym sutyknucca ź niemahčymaściu sfarmavać parłamienckuju bolšaść.
Apazicyja, najpierš libieralnaja «Hramadzianskaja płatforma», spadziajecca, što siońniašniaja demanstracyja aktyvizuje vybarnikaŭ. «Nadychodziać vialikija pieramieny, heta znak adradžeńnia Polščy», — źviarnuŭsia da ŭdzielnikaŭ mitynhu ŭ centry Varšavy lidar «Hramadzianskaj płatformy» Donald Tusk.
Pavodle Tuska, vybary stanuć vyrašalnymi dla pravoŭ žančyn i mienšaściaŭ u Polščy.
Fota: Radyjo Svaboda
PiS znachodzicca va ŭładzie ad 2015 hoda i viadzie svaju kampaniju, abiacajučy strymać prytok mihrantaŭ u Polšču i davać finansavuju padtrymku siemjam i ludziam stałaha vieku.
Hramadski telekanał TVP, jaki krytyki nazyvajuć ruparam urada, cytuje palicyju, jakaja acaniła kolkaść udzielnikaŭ siońniašniaj demanstracyi prykładna ŭ 100 tysiač. Pavodle Tuska, u demanstracyi biare ŭdzieł bližej da miljona čałaviek. Pavodle padlikaŭ najbujniejšaha polskaha internet-partała Onet, u maršy ŭziali ŭdzieł pryblizna 600-800 tysiač čałaviek, a daŭžynia kałony była kala 4,5 km.
