Minčuku za kamientary ŭ internecie dali «chatniuju chimiju» i prysudzili hihancki štraf
3 žniŭnia ŭ sudzie Centralnaha rajona Minska byŭ ahučany prysud 51-hadovamu inžynieru Siarhieju Kačuku. Jon asudžany da piaci hadoŭ chatniaj chimii. Taksama jon musić vypłacić 200 bazavych vieličyniaŭ štrafu (7 400 rubloŭ).
Jaho pryznali vinavatym adrazu pa dvuch artykułach:
- č. 1 art. 366 (hvałt albo pahroza hvałtu ŭ dačynieńni da słužbovaj asoby ci inšaj asoby, jakaja vykonvaje hramadski abaviazak)
- i art. 369 (abraza pradstaŭnika ŭłady) Kryminalnaha kodeksa.
Vyrak ahučyła sudździa Julijana Ščerba.
Siarhieju ŭ vinu stavilisia kamientary ŭ telehramie ŭ bok supracoŭnikaŭ orhanaŭ unutranych spraŭ i KDB, jakija jon nibyta pakidaŭ u sacsietkach sa žniŭnia 2021-ha pa luty 2022 hoda.
Zhodna z pazicyjaj abvinavačańnia, Kačuk imknuŭsia pakazać ich «u źnievažalnym stanoviščy ŭ vačach šyrokaj hramadskaści». Niekatoryja z kamientaroŭ — u bok supracoŭnika KDB — abvinavačańnie kvalifikavała nie tolki pavodle art. 369, ale i pavodle č. 1 art. 366 Kryminalnaha kodeksa — jak pahrozu hvałtu.
Mužčyna pryznaŭ vinu i raspavioŭ, što jon sapraŭdy pakidaŭ kamientary ŭ čacie pad publikacyjami.
Siarhiej dobraachvotna kampiensavaŭ srodki, jakija rascanili jak pryniesienuju škodu. Jon vypłaciŭ adnamu z paciarpiełych 2000 rubloŭ, apłaciŭ dziaržpošlinu — 111 rubloŭ.
Viadoma, što mužčynu zatrymlivali, ale potym vyzvalili z-pad varty: da suda jon znachodziŭsia na voli pad zakładam u 7400 rubloŭ.
Čytajcie taksama:
Siłaviki zatrymali žychara Salihorska nibyta za pierapisku z bataljonam «Teror»
U Rečycy pačynajecca sud nad Palinaj Šarendaj-Panasiuk. Jaje źbirajucca treci raz pakinuć za kratami
