«Rašeńni režymu papaŭniajuć śpis złačynstvaŭ». Rada BNR na zaviadzieńnie kryminalnaj spravy
Rada BNR adreahavała na zaviadzieńnie kryminalnaj spravy, zajaviŭšy, što heta nie paŭpłyvaje na pracu instytucyi.
«Hety fakt nijakim čynam nie paŭpłyvaje na dziejnaść Rady BNR, jaje ŭzajemadziejańnie z demakratyčnymi siłami Biełarusi i jaje padtrymku biełaruskich dobraachvotnikaŭ, jakija vajujuć za svabodu i niezaležnaść Ukrainy.
Bolš za toje, zaviedama niezakonnyja i abhruntavanyja ekstremisckaj ideałohijaj režymu Łukašenki rašeńni i dziejańni, u tym liku psieŭdajurydyčnaha charaktaru, papaŭniajuć śpis złačynstvaŭ, jakija mohuć być padstavaj dla kryminalnaha pieraśledu datyčnych da ich asobaŭ paśla adnaŭleńnia zakonnaści na terytoryi Biełarusi.
Abvinavačvańni suprać Rady BNR, u tym liku zajavy pra admaŭleńnie Radaj BNR niezaležnaści biełaruskaj dziaržavy, nosiać zaviedama iłžyvy i absurdny charaktar, asabliva z ulikam taho, što mienavita Rada BNR 25 sakavika 1918 hodu abvieściła pra dziaržaŭny suverenitet Biełarusi, ad čaho viadzie svoj adlik historyja sučasnaj suvierennaj Biełarusi», — havorycca ŭ zajavie.
Taksama Rada BNR nahadvaje, što nieadnarazova asudžała tatalitarnyja režymy, jakija ździajśniali złačynstvy na terytoryi Biełarusi, u tym liku režym niamieckich nacyjanał-sacyjalistaŭ.
Tak, u zajavie dva hady tamu ad 22 červienia 2021 h., pryniataj z nahody vaśmidziasiatych uhodkaŭ ad pačatku hitleraŭskaj akupacyi Biełarusi, Rada BNR kazała pra nastupnaje:
«Rada BNR salidaryzujecca z rašeńniami Niurnbierskaha trybunała ŭ asudžeńni dakazanych vajskovych złačynstvaŭ, ździejśnienych na terytoryi Biełarusi niamieckimi vojskami i ichnymi chaŭruśnikami, u tym liku jak biełarusami, tak i rasijskimi nacyjanalistami i pradstaŭnikami inšych krainaŭ. Rada BNR asudžaje ŭsie arhanizacyi, pryznanyja złačynnymi rašeńniem Niurnbierskaha trybunała. Razam z tym, Rada BNR asudžaje prapahandysckaje złoŭžyvańnie temaj trahiedyi Druhoj Suśvietnaj vajny z boku tatalitarnaha savieckaha režymu i jahonych sučasnych spadkajemcaŭ.
Kamunistyčnyja ŭłady vykarystoŭvali kałasalnuju traŭmu biełaruskaha naroda ad vajny dziela manipulavańnia našym narodam, raspalvańnia varažniečy da inšych krainaŭ, prychavańnia pamiaci pra masavy saviecki palityčny teror i masavyja savieckija vajskovyja złačynstvy, a taksama dziela ŭmacavańnia svajoj złačynnaj antybiełaruskaj ułady», — havaryłasia ŭ zajavie dva hady tamu.
Čytajcie taksama:
