Biełaruska z «Pieśni hoda» biare ŭdzieł u polskaj viersii šou «Hołas»
Biełaruska Maryna Viarenič biare ŭdzieł u polskim muzyčnym šou The Voice of Poland. Na ślapych prasłuchoŭvańniach jana vykanała kampazicyju Bleeding Love Lavony Luis. Nie ŭsie sudździ paviarnulisia padčas vystupu, ale jon vielmi spadabaŭsia publicy, piša Most.
Maryna Viarenič. Fota: Voice.tvp.pl
U Minsku Maryna atrymała muzyčnuju adukacyju (estradny vakał), była vakalistkaj kavier-hurta Symphorine, brała ŭdzieł u «Pieśni hoda». Vykładała vakał i zajmałasia kancertnaj dziejnaściu.
Na sajcie prajekta The Voice of Poland paznačana, što ŭ Maryny polskija karani, a ŭ lipieni hetaha hoda jana atrymała polskaje hramadzianstva.
U Biełarusi, pracujučy ŭ domie kultury, Maryna paznajomiłasia z budučym mužam, muzykam Viktaram, ź jakim jana adpraviłasia ŭ Kareju. Tam jany praviali try hady, dajučy kancerty ŭ restaranie hatela, ale praz pandemiju byli vymušanyja viarnucca ŭ Biełaruś. Paźniej siamja vyrašyła pierajechać u Polšču.
U Polščy Maryna pačała pracavać asistentkaj stamatołaha, ale nie kinuła muzyku. Razam z mužam jany pišuć pieśni i chočuć vypuścić ich na polskaj movie. Maryna spadziajecca, što prajekt The Voice of Poland joj u hetym dapamoža.
Polskaje šou The Voice of Poland vychodzić na TVP-2 z 2011 hoda i karystajecca vialikaj papularnaściu ŭ hledačoŭ.
Čytajcie taksama:
Biełaruska trapiła na amierykana-karejskuju «fabryku zorak». Što pra jaje viadoma?
«Dyskateka SSSR», cyrk, ukrainka z Rasii: kvitki na jakija kancerty razychodziacca ciapier najlepš
