Kolki kaštuje ŭskłaści kvietki na mahiłu blizkaha dystancyjna
Viartacca ŭ Biełaruś dla taho, kab naviedać mahiłu blizkaha čałavieka, dla mnohich zaraz niemahčyma. Pahladzieli, kolki kaštuje z-za miažy arhanizavać uborku mahiły abo dystancyjna ŭskłaści kvietki.
Apošnim časam na fejsbuku aktyŭna rekłamujecca grave.by, jaki pazicyjanuje siabie pieršym u Biełarusi anłajn-servisam pa dobraŭładkavańni miescaŭ pachavańnia.
Adrazu bačna, što servis aryjentavany na biełarusaŭ zamiežža, bo ŭsie ceny na sajcie paznačany ŭ jeŭra. Naprykład, fotazdymka i acenka stanu pachavańnia kaštuje 20 jeŭra, razavaja pryborka na miescy pachavańnia — 50 jeŭra, hadavy dahlad — 150 jeŭra. Jość mahčymaść zamović prosta ŭskładańnie žyvych kvietak da pamiatnaj daty — heta abydziecca ŭ 25-30 jeŭra.
Sajt navechno.by prapanoŭvaje jak razavuju ŭborku mahiły (kaštuje ad 250 rubloŭ), tak i prosta naviedvańnie mahiły, padčas jakoha ŭskładajucca kvietki i zapalvajucca łampadki (kaštuje ad 50 rubloŭ).
Na sajcie moikorni.com paznačana, što za razavuju ŭborku dy ŭskładańnie kvietak pryjdziecca zapłacić ad 30 dalaraŭ.
Sajt requiem.by prapanoŭvaje tolki kompleksnyja pasłuhi: uborka z afarboŭkaj aharodžy i ŭskładańniem kvietak, zapalvańniem śviečak abydziecca ŭ 320 rubloŭ.
Taksama možna pašukać pryvatnyja prapanovy na handlovaj placoŭcy kufar.by — tam cana ŭborki pačynajecca ad 50 rubloŭ. U instahramie jość akaŭnty, jakija rekłamujuć anałahičnyja pasłuhi: naprykład, za dastaŭku kvietak na mahiłu chočuć atrymać 20 rubloŭ (biez uliku cany samich kvietak), a za zapalvańnie łampadki — 15 rubloŭ.
