Niekalki ŭkraincaŭ było siarod dziasiatkaŭ zahinułych u strašnaj katastrofie aŭtobusa ŭ Vieniecyi
Pryčyna avaryi pakul nieviadomaja, na miescy zdareńnia praciahvajuć pracavać ratavalniki.
Avaryja aŭtobusa z turystami ŭ Vieniecyi. Fota: Antonio Calanni / AP
Prynamsi 21 čałaviek, u tym liku dvoje dziaciej, zahinuli paśla taho, jak aŭtobus źlacieŭ z estakady blizu italjanskaj Vieniecyi i zahareŭsia, piša Bi-bi-si — Ukraina.
Miascovyja ŭłady paviedamili, što siarod zahinułych jość ukraincy. Vydańni Repubblica i Ansa nazyvajuć ich kolkaść — prynamsi piaciora.
Jak paviedamlajuć miascovyja ŚMI, jašče 18 čałaviek atrymali ranieńni ŭ vyniku avaryi. Siarod ich u ciažkim stanie piać čałaviek. Miascovyja ŚMI pišuć, što siarod ciažkaparanienych jość ukraincy — 4-hadovaja dziaŭčynka i 50-hadovaja žančyna.
Asoby 14 zahinułych jašče nie ŭstanavili.
Aŭtobus prabiŭ šłahbaum i ŭpaŭ kala čyhunačnych šlachoŭ u rajonie Miestre, jaki złučajecca ź Vieniecyjaj mostam.
Pavodle paviedamleńniaŭ, jon byŭ arandavany dla pieravozki turystaŭ pamiž Vieniecyjaj i kiempinham u susiednim rajonie Marhiera.
Mer Vieniecyi Łuidžy Bruńjara zajaviŭ, što adbyłasia «vialikaja trahiedyja». «Apakaliptyčnaja scena, niama słoŭ», — napisaŭ jon u X.
Incydent adbyŭsia prykładna a 19:45 pavodle miascovaha času (17:45 pavodle Hrynviča), kali aŭtobus viartaŭsia z turystami ŭ kiempinh.
Pavodle niekatorych paviedamleńniaŭ, aŭtobus, jaki pracavaŭ na mietanie, upaŭ na linii elektrapieradačy i zahareŭsia.
«Faktaram pavieličeńnia nastupstvaŭ staŭ mietan, i pažar chutka raspaŭsiudziŭsia», — skazaŭ ministr unutranych spraŭ Matea Pijantedosi, papiaredziŭšy, što kolkaść zahinułych moža ŭzraści.
Hubiernatar rehijonu Łuka Zaja skazaŭ, što siarod zahinułych i paranienych jość ludzi «roznych nacyjanalnaściaŭ, nie tolki italjancy».
Pryčyna avaryi pakul nieviadomaja, na miescy zdareńnia praciahvajuć pracavać ratavalniki.
Premjer-ministr Italii Džordža Miełoni zajaviła, što sočyć za raźvićciom padziej, i vykazała spačuvańni.
Prezident Jeŭrapiejskaj kamisii Ursuła fon der Lajen zajaviła, što padtrymlivaje italjanskich lidaraŭ u hety «momant hłybokaha bolu».
Čytajcie taksama:
