Adpačynak maładych arystakrataŭ
Sport — nie tolki baraćba za rekordy, ale i atrybut raskošnaha žyćcia.
Sport — nie tolki baraćba za rekordy, ale i atrybut raskošnaha žyćcia.
Vidy sportu, jakija zvyčajna adnosiać da elitnych, raźvityja ŭ Biełarusi słaba. Bolšaść ź ich adnosicca da indyvidualnych i patrabuje vialikich układańniaŭ. Zrešty, tamu jany i ličacca arystakratyčnymi.
Hulnia biznesoŭcaŭ
Idealna padstryžanyja zialonyja pali, biełaśniežny miačyk i kluška — heta holf. Adna z samych darahich, i tamu samych prestyžnych hulniaŭ u śviecie. Holf uniesieny ŭ śpis abaviazkovych dyscyplin u najlepšych univiersitetach śvietu. Padčas hulniaŭ časta prachodziać biznes‑pieramovy, kartki siabroŭ holf‑kłubaŭ kaštujuć dziaciatki tysiač dalaraŭ. A samy bahaty spartśmien śvietu Tajhier Vuds zarabiŭ svoj miljard, dziakujučy mienavita holfu.
Addać dzicionka ŭ Akademiju holfa pakul niemahčyma, bo ŭ Biełarusi takich ustanoŭ niama. Taja ž situacyja i z palami… Uvohule kolkaść hulcoŭ nie pieravyšaje dziasiatka čałaviek.
Pieršy ŭ krainie holf‑kłub budujecca niepadalok ad Minska, pad Kałodziščami. Košt dvuch paloŭ aceńvajecca ŭ $15 miljonaŭ. Kala ich pavinien adkrycca i centr navučańnia. Ceny na treniroŭki nieviadomyja, ale, naprykład, u Maskvie paŭtary hadziny ź instruktaram kaštujuć $100.
U 2016 hodzie holf źjavicca ŭ prahramie Letniaj Alimpijady. Navučycca za hety čas hulni całkam mahčyma.
Niezahnanyja koni
Konny sport padychodzić Biełarusi našmat bolš. Na biaskrajnich palach nie budzie prablem dla trenirovak. Najbujniejšy ŭ Biełarusi konny centr znachodzicca ŭ Ratamcy, za niekalki kiłamietraŭ na zachad ad stalicy. Źbirajucca tam budavać i ipadrom — voś tolki znajści b inviestara na $160 miljonaŭ.
Asnoŭnyja ŭkładańni dla tych, chto vyrašyć zaniacca hetym vidam sportu, — pakupka kania, jaki kaštuje ad tysiačy da miljona dalaraŭ u zaležnaści ad radavodu. Jaho ŭtrymańnie ŭ naležnych umovach — jašče minimum $200 u miesiac. Patrebnaja jašče ekipiroŭka dla vieršnika. Minimalny nabor — tysiača dalaraŭ.
Na letašniaj Alimpijadzie najlepšaj ź biełarusak stała Iryna Lis. Viarchom na Redfardzie jana ŭziała tolki 30‑ie miesca. Koń toj, darečy, kaštuje miljon dalaraŭ. Daražej za samy darahi aŭtamabil.
Navypieradki ź vietram
Raśsiakać vadu na Minskim mory pačali 50 hadoŭ tamu. Ciapier dla achvotnych zajmacca vietrazievym sportam pracujuć śpiecyjalizavanyja dziciača‑iunackaja škoła alimpijskaha reziervu i centr alimpijskaj padrychtoŭki.
Dałučycca da kampanii aliharchaŭ na jachtach za dziasiatki miljonaŭ dalaraŭ možna i biez pastajannych zaniatkaŭ sportam. U Biełarusi jość mahčymaść prajści kurs navučańnia i atrymać siertyfikat na kiravańnie jachtaj.
Tut vam nie Ispanija
Adzin z samych vysokaapłatnych vidaŭ sportu — tenis. Ale na ałtar pośpiechu dziciaci baćki pavinny pakłaści ŭsie svaje siły. Čempijony vialikaha tenisa rychtujucca ŭ śpiecyjalizavanych škołach i akademijach u Ispanii ci ZŠA. Atrymać dobruju tenisnuju adukacyju ŭ Minsku možna. Dy słavutyja biełaruskija spartśmieny — Viktoryja Azaranka i Maksim Mirny — ź dziacinstva vučylisia za miažoj.
Ale nie ŭsim ža stanavicca čempijonami! Navučycca hulać možna i ŭ Minsku. Arenda korta kaštuje ad 20 da 50 tysiač rubloŭ za hadzinu. Ich kolkaść užo idzie na dziasiatki. Jość i ŭ stalicy, i ŭ Łahojsku. Prafiesijnaja rakietka — ad $150.
Hulni ekanom‑kłasa
Spałučeńnie fizpadrychtoŭki i raźvićcio intelektualnych zdolnaściaŭ daje biljard. Jon užo nabliziŭsia da ahulnadastupnych vidaŭ sportu. Arenda stała kaštuje kala 10 tysiač rubloŭ za hadzinu. Uroki hulni ŭ prafiesijanała abyducca ŭ 30 tysiač za hadzinu.
Šachmaty dajuć intelektualnuju padrychtoŭku. Hurtki — zvyčajna biaspłatnyja — pry kožnym domie kultury i ŭ mnohich škołach — pieratvaryli hulniu ŭ narodnuju.
Siabravać sa sportam stanovicca modna. Futboł i valejboł adkryty kožnamu, a voś bolš ekzatyčnyja vidy sportu dapamahajuć vyłučycca siarod inšych. Heta taja situacyja, kali možna hanarycca navat umieńniem prosta hulać.
