74‑hadovy žodziniec za hod prabieh ź bieł‑čyrvona‑biełym ściaham u 23 marafonach + foty
Andrej Paŭłavič Karalenka pačaŭ surjozna zajmacca bieham tolki ŭ 64 hady. Niečakana dla blizkich u 70 jon pieraadoleŭ dystancyju ŭ 31 kiłamietr.
Andrej Paŭłavič Karalenka pačaŭ surjozna zajmacca bieham tolki ŭ 64 hady. Niečakana dla blizkich u 70 jon pieraadoleŭ dystancyju ŭ 31 kiłamietr. Pry hetym na ŭsie aficyjna arhanizavanyja marafony žodzinski piensijanier vychodzić vyklučna ŭ formie ź bieł‑čyrvona‑biełym ściaham.
Andrej Karalenka bolš za 30 hod adpracavaŭ na BiełAZie inžynieram‑kanstruktaram, byŭ deputatam Žodzinskaha harsavieta, pamočnikam deputata Viarchoŭnaha Savieta. Padčas pierachodu Biełarusi da niezaležnaści pačaŭ razmaŭlać pa‑biełarusku, staŭ siabram ruchu BNF, chadziŭ na mitynhi.
Paśla vychadu na piensiju ad Andreja Paŭłaviča vialikaj aktyŭnaści nie patrabavałasia. Ab padtrymcy svajoj fizičnaj formy jon nie dumaŭ.
Ale zajmacca sportam prymusiła niečakanaja znachodka.
Zimoju 2000 hoda na leciščy Karalenka niečakana znajšoŭ ščaniukoŭ. Adnaho ź ich pakinuŭ u svajoj kvatery i viasnoj pačaŭ jaho vyhulvać. Maleńki sabačka biehaŭ šparka, i Andreju Paŭłaviču mimavoli prychodziłasia dahaniać jaho bieham.
Nieŭzabavie 64‑hadovy piensijanier źmianiŭ boty na kiedy i staŭ rabić prabiežki na 3 km. Uciahnuŭsia. Kali sabačka raptoŭna pamior, Andrej Karalenka praciahvaŭ biehać adzin. I dabiehaŭsia da taho, što adnojčy jaho zaprasili ŭ kłub amataraŭ biehu na BiełAZie. Zavod spansavaŭ udzielnikam kłuba vyjezdy na marafony.
Na «Minskaj vosieni‑2001» Andrej Paŭłavič upieršyniu pieraadoleŭ dystancyju ŭ 10 km. Jašče praź niekalki hod, kali jamu było ŭžo 70, piensijanier ździviŭ svaich blizkich niečakanym rekordam — na Maładziečanskim marafonie jon prabieh 31 kiłamietr!
— Najbolš składana mnie biehčy dystancyju ŭ 5 km.
Biahuć tam davoli chutka. A mnie staromu nie chočacca ad ciotak adstavać, choć jany i maładziejšyja za mianie, — raskazvaje «Salidarnaści» Andrej Karalenka. — A voś na «dziesiatcy» možna pavolna ŭvachodzić u bieh: prabieh čatyry kiłamietry — i paśla biažy jašče choć čatyrnaccać.
Pry hetym 74‑hadovy Andrej Paŭłavič z žalem kanstatuje: nazvać siabie marafoncam jon nie moža.
— Chłopcy mnie skazali, što marafonskaja dystancyja pačynajecca paśla 32 km. A ja ž prabieh adnojčy tolki 31 kiłamietr. Tak što jašče nie adčuŭ, dzie marafon pačynajecca, — kaža jon.
Andrej Paŭłavič invalid pa zroku. Ale zajmacca sportam jamu heta nie pieraškadžaje.
Naadvarot: sport dapamahaje lekavać chvarobu.
— Jak ja pačaŭ biehać, u mianie spynilisia admoŭnyja pracesy ŭ vačach. Doktar admianiła mnie try lakarstvy! — adznačaje piensijanier. — Moža być bieh paspryjaŭ tamu, što ja ŭvohule jašče baču…
Andrej Paŭłavič nie samy stary ŭdzielnik biełaruskich marafonaŭ. Ale na dystancyi jon vyłučajecca zaŭsiody. Z 2004 hoda Karalenka biehaje ŭ formie ź bieł‑čyrvona‑biełym ściaham. Zvyčajna nacyjanalnaja simvolika prysutničaje na im ŭ vyhladzie našyŭki na majcy i stužki na hałavie.
— Ja adzin taki. Astatnija spačatku ździŭlalisia, ale na trasie ŭsie roŭnyja. Tolki znajomy Hiena Sakałoŭski da majoj formy nie vielmi dobra adnosicca, kaža, što ja z apazicyi. Ale ja nie apazicyja, bo ja biełarus, heta moj dom, maja ziamla. Apazicyja — tyja, chto čyrvona‑zialonyja, — ličyć Andrej Piatrovič.
Ale zatym Karalenka dadaje: da biehunoŭ u čyrvona‑zialonaj formie jon stavicca z parazumieńniem.
A voś ź im adnojčy zdaryŭsia vielmi prykry vypadak.
3 lipienia minułaha hoda piensijaniera schapili pierad startam na «Minskim marafonie». U supravadžeńni aŭtamatčyka Andreja Paŭłaviča dastavili ŭ HAUS, dzie pratrymali niekalki hadzin…
Za minuły hod piensijanier z Žodzina prabieh dystancyi ad 10 da 21 km (paŭmarafona) na 23 marafonach: bresckim, babrujskim, maskoŭskim, sankt‑pieciarburhskim, žłobinskim i h.d. Apošni start byŭ u Minsku naprykancy śniežnia pry 15 hradusnym marozie kala lehkaatletyčnaha kompleksa pa vulicy Kalinoŭskaha. Ciapier, kali niama marazoŭ i vialikaha śniehu, Andrej Paŭłavič, biehaje try razy na tydzień: u aŭtorak — 7‑10 km, u čaćvier — 7‑10 km, u niadzielu — 15 km. Kali heta jamu ŭdajecca, jon adčuvaje siabie svabodnym.
Da rekordaŭ Karalenka nie imkniecca. Choča tolki praz hod, kali jamu budzie 75, prabiehčy paŭmarafon.
