24 kastryčnika ŭ Viarchoŭnym sudzie pačalisia słuchańni pa spravie eks-staršyni Dziaržkamitetu pa avijacyi Fiodara Ivanova. Ahulnuju škodu ŭ vyniku jahonych dziejańniaŭ śledztva acaniła ŭ 1,859 młrd rub. Padsudny prosić źmianić jamu mieru strymańnia dziela syna.

Jaho abvinavačvajuć pa č.3 art.424 KK (złoŭžyvańnie słužbovymi paŭnamoctvami, učynienaje praz asabistuju zacikaŭlenaść asobaj, jakaja zajmaje adkaznuju pasadu) pa čatyroch epizodach. Razam z hałoŭnym avijataram krainy na łavie padsudnych apynulisia Ivan Šymaniec — hieneralny dyrektar RUP «Biełaeranavihacyja» i były vykanaŭca abaviazkaŭ dyrektara aeraportu «Miensk-1» Vasil Łazar.

Sud pačaŭsia z taho, što była spyniena vytvorčaść pa spravie I.Šymanca. Hiendyrektar RUP «Biełaeranavihacyja» abvinavačvaŭsia ŭ «nienaležnym vykanańni słužbovych paŭnamoctvaŭ i naniasieńni škody ŭ bujnych pamierach», adnak termin daŭnaści z momantu ŭčynieńnia procipraŭnaha ŭčynku (dva hady) prajšoŭ. Zatoje sud adchiliŭ chadajnictva F.Ivanova nakont paŭtornaj techničnaj ekspertyzy salonu samalota «Jak-40». Mienavita pieraabstalavańnie salonu i dało materyjał dla kryminalnaj spravy.

Dziaržkamavijacyja atrymała zadańnie ad premjera Siarhieja Sidorskaha: zrabić salon pavyšanaj kamfortnaści dla ŭradavych metaŭ. Padtrymaŭ ideju prezydent, zahadaŭšy vydzielić ź biudžetu 893 tys. dalaraŭ na ramontnyja raboty.

F.Ivanoŭ vyrašyŭ skarystacca pasłuhami maskoŭskaj kampanii «Kvant». Abvinavačańnie tak i adznačaje: «Jon zahadzia viedaŭ, što paniasie straty, ale dazvoliŭ vykonvać raboty». Hrošaj nie chapiła, i Ivanoŭ rasparadziŭsia ŭziać srodki ź niebiudžetnaha fondu (391 tys. dalaraŭ), a potym zmusiŭ Mienski avijaramontny zavod nabyć adnoŭleny salon. U vyniku dziaržava i zhadany zavod panieśli niemałyja straty, a kiraŭnik Dziaržkamavijacyi ŭtaiŭ ad sp.Sidorskaha realny košt ramontu.

Druhi epizod abvinavačvańnia tyčyć składzkoha pamiaškańnia. Pavodle śledztva, Ivanoŭ zahadaŭ Ivanu Šymancu pradać skład u Bieraści pa zanižanym košcie (70 młn rub.). Realnaja cana składu była vyznačana ŭ 306 młn (plus košt abstalavańnia — 233 młn). Potym skład byŭ pierapradadzieny za 323 młn rub. Dziela čaho heta rabiłasia — nieviadoma

Treci epizod zakranaje tahačasnaha v.a. dyrektara aeraportu «Miensk-1» V.Łazara. Ivanoŭ niby abaviazaŭ Łazara ŭvieści ŭ ekspluatacyju palikliniku, jakaja znachodziłasia na balansie aeraportu, niahledziačy na toje, što investar, jaki musiŭ pravieści kapitalny ramont, nia vykanaŭ svaich abaviazkaŭ. Naniesienaja škoda aceniena ŭ 54,4 młn rub.

I, narešcie, apošni łancužok u hetaj spravie. Pavodle versii abvinavaŭcy, Ivanoŭ stvaryŭ štučnuju vytvorčuju nahruzku pierad pryjezdam Łukašenki na Aršanski avijaramontny zavod, kab schavać realnaje stanovišča spraŭ u svajoj halinie, pakazaŭšy najaŭnaść zakazaŭ. Dziela hetaha jon zahadaŭ «Biełavija» nakiravać samalot «Tu-134a» na ramont u Voršu, choć toj ramont i nia byŭ metazhodny. «Biełavija» nie zapłaciła za vykananyja raboty, a Aršanski zavod nia zdoleŭ da kanca adramantavać samalot. Pryjšłosia zaprašać specyjalistaŭ ź Mienskaha avijaramontnaha. Ahulnaja škoda ŭ vyniku takich dziejańniaŭ była aceniena ŭ 1,859 młrd rubloŭ.

Fiodar Ivanoŭ na sudzie viny nie pryznaje, zajaŭlajučy pra zahadzia splanavanuju pravakacyju: «Zhadanyja akaličnaści mieli miesca, ale ja dziejničaŭ nie naŭmysna i nijakaj škody dziejańniami nie prynios». Vystupajučy na sudzie, Ivanoŭ demanstravaŭ svaju addanaść dziaržaŭnym intaresam i šmat razoŭ zhadvaŭ Łukašenku: spasyłaŭsia na jaho stanoŭčyja acenki, artykuły ŭ presie, navat pryvodziŭ jaho słovy («Prezydent skazaŭ, što Ivanoŭ uźniaŭ avijahalinu!»). Vykarystoŭvaŭ emacyjnyja pasłańni («Abvinavačvać mianie — značyć nie pavažać svoj narod!») i rytaryčnyja vokličy («Jak ja moh nanieści škodu zavodu, dzie pracavaŭ 30 hod?!»).

Byłomu hałoŭnamu avijataru krainy pahražaje maksymum da vaśmi hod pazbaŭleńnia voli z kanfiskacyjaj majomaści i zabaronaj zajmać peŭnyja pasady.

Tym časam advakat padsudnaha paprasiŭ źmianić jamu mieru strymańnia. Reč u tym, što były kiraŭnik avijacyi znachodzicca pad chatnim aryštam, a prysutnaść milicyjanta ŭ domie vyklikaje prystupy ahresii ŭ syna F.Ivanova, invalida druhoj hrupy, jaki pakutuje ad psychičnaha zachvorvańnia. Chłopcu patrebny dahlad i procipakazanaja prysutnaść čužych ludziej u chacie.

Dziaržaŭny kamitet pa avijacyi

padnačalvajecca Savietu ministraŭ, a staršynia pa svajmu statusu adpaviadaje ministru. Paŭnamoctvy staršyni vyznačajucca zahadam prezydenta. U strukturu kamitetu ŭvachodziać vosiem aeraportaŭ, Mienski i Aršanski avijaramontnyja zavody, Vyšejšy avijacyjny kaledž, avijakampanii «Biełavija», «Transekspart», «Homielavija», šerah pryvatnych avijakampanij.

Ivanoŭ stvaryŭ štučnuju vytvorčuju nahruzku pierad pryjezdam Łukašenki

na Aršanski avijaramontny zavod, kab schavać realnaje stanovišča spraŭ u svajoj halinie i pakazać najaŭnaść zakazaŭ. Pa versii śledztva, dziela hetaha jon zahadaŭ «Biełavija» nakiravać samalot «Tu-134a» na ramont, choć toje nie było metazhodnym.

Клас
Панылы сорам
Ха-ха
Ого
Сумна
Абуральна