Z pačućciom hłybokaha zadavalnieńnia vysłuchaŭ prezydenckuju spravazdaču ab raskryćci viciebskaj spravy. Z tajamničymi vybuchami piŭnych blašanak pakončana.

Bolš za ŭsio ŭ prezydenckim «Elementarna, Uotsan» prykałoła nia toje, što frajarkoŭ tak chutka ŭpakavali, a sacyjalnaja pryroda złačynstva.

Za teraktami stajali nie varahi-čačency i nia Neo z Marfejem — bajeviki z «Narodna-vyzvalenčaha vojska», jakija narešcie znajšli vychad z matrycy. Viciebskimi Ravašolami akazalisia niejkija «achłamony».

U śviatle skazanaha viciebskija vybuchi možna ličyć novaj staronkaj u historyi biełaruskaha teraryzmu. Raniej matyvy nieści piratechniku ŭ masy byli vyklučna palityčnymi abo materyjalnymi. Hryniavicki, kidajučy «machine infernale» ŭ carski členavoz, maryŭ pra narodnicki sacyjalizm. Kiler 1990-ch, čakajučy ŭ zasadzie klijenta, budavaŭ pavietrany zamak — prykinucca ŭ malinavy łapserdak i achamucicca załatym łancuhom. Viciebskimi terarystami ruchała žadańnie čysta psychalahičnaj satysfakcyi. Takoje pačućcio niemahčyma atrymać, adkapaŭšy Aŭhustoŭski kanał, zrabiŭšy z voraha bifšteks u «Mortal Kombat: Shaoling Monks» dy vykaciŭšy 0,7 «kryžačka». Prychod kajfu harantuje tolki parušeńnie artykułaŭ kryminałki. Va ŭsim śviecie takaja sacyjalnaja źjava nazyvajecca chulihanstvam.

Pahladzicie na fajł bratoŭ M., jakija padazrajucca ŭ arhanizacyi vybuchaŭ: adzin harbacicca na zavodzie, druhi — na rynku. Kali pryniać versiju šyzy, treba ŭtylizavać usiu systemu adukacyi i sacyjalizacyi, jakaja płodzić terarystaŭ, a potym jašče ŭładkoŭvaje ich na pradpryjemstva. Napeŭna, treba dać poŭchu i BRSM, siabrami jakoha, chutčej za ŭsio, byli viciebskija braty Hafs.

U pryncypie, dziaržava pavinna tolki vitać renesans chulihanstva. Chulihan — nieadjemny spadarožnik dobrych savieckich časoŭ, kudy tak prahnie Łukašenka. U kaŭbasnyja časy Brežnieva samym modnym paratunkam ad nudoty było spalić knopki ŭ lifcie i nakremzać uhary: «Fantamas».

Zmahacca z chulihanami niemahčyma: ich krynica — sama systema. Tamu ŭ saŭku prydumali vielmi klasny chod — raskručvali vobraz «patryjatyčnaha chulihana»: drobny złačyniec, apynuŭšysia pierad dylemaj: pradać Radzimu i zarabić miech hrošaj abo zastacca viernym rašeńniam źjezdu KPSS, — vybiraŭ apošniaje.

Našy mandaryny taksama asudžany zaniacca stvareńniem «lajalnaha achłamona». Pieršym krokam moža być sudovy praces nad M. U pracesie słuchańniaŭ raptam mahło b uspłyć, što adna ź piakielnych blašanak pryznačałasia fašystam ź viciebskaha «Fondu Sapiehi», jakija chacieli zamucić vidavočna antybaćkoŭski «seminar redaktaraŭ niezaležnych biuleteniaŭ».

Клас
Панылы сорам
Ха-ха
Ого
Сумна
Абуральна