Novy lider apazycyi viazie prapanovu admovicca ad papulizmu ŭ adnosinach Biełarusi i Rasiei. «Vydatna, kali jany taksama buduć ščyrymi». Madel Milinkieviča: «Što vyhadna dla Rasiei i dla nas — toje robim». Budučy vizyt adzinaha kandydata ŭ stalicu Rasiei intryhuje tajamničaściu: dahetul nie paviedamlajucca ni kankretnaja data, ni prykładny śpis rasiejskich surazmoŭcaŭ novaha lidera biełaruskaj apazycyi. Sam Milinkievič nie vyklučaje, što niekatoryja ź ich paprosiać nie afišavać fakt sustrečy. Nie havoryć Milinkievič i pra toje, chto mienavita jaho zaprašaje: «Prapracoŭvajecca vizyt. Buduć sustrečy — moža, u Administracyi, moža, u Dumie. Treba jechać. Čamu nie?»
Dla čaho Milinkievič jedzie ŭ Maskvu? «Hałoŭnaja meta vielmi prostaja, — kaža jon. — Treba buryć vobraz voraha. Łukašenka ŭvieś čas kaža, što kali nia jon, dyk pryjduć hetyja nacyjanalisty, kitajskaja ściana pabudujecca, hazapravod pierakryjuć. Poŭnaja chłuśnia».
U Maskvie Milinkievič źbirajecca davieści nastupnaje: «U Biełarusi jość nacyjanalny intares. Dla absalutnaj bolšaści — zachavańnie dziaržavy. Jany pavinny ab hetym viedać». Ale ci buduć zdolnyja rasiejskija palityki heta zrazumieć? «Fundamentalnaja prablema dačynieńniaŭ biełaruskaj apazycyi z Rasiejaj — nie ŭ samoj apazycyi i jaje (nibyta) antyrasiejskaści, — kaža palitolah Vital Silicki. — Prablema ŭ tym, što ŭ Rasiei navat na ŭzroŭni «liberalnych adščapiencaŭ» nakštałt Niamcova nie isnuje ŭsprymańnia Biełarusi jak niezaležnaj dziaržavy».
Svaje pazycyi A.Milinkievič ad pačatku akreślivaŭ jasna. Novaja ŭłada budzie vybudoŭvać z Rasiejaj vyklučna siabroŭskija adnosiny. Rasieja pavinna stać stratehičnym partneram Biełarusi. Ale nijakich fantomaŭ «sajuznaj dziaržavy». Bo «niezaležnaść — heta śviatoje», i luby handal joju budzie spynieny.
A.Milinkievič vieryć, što supolnuju movu z rasiejskim palityčnym bamondam možna znajści na hruncie zdarovaha prahmatyzmu. «Mnie zdajecca, što treba apelavać u pieršuju čarhu da tych ludziej, dla jakich prahmatyčnaja palityka na pieršym miescy, — kaža jon. — Što vyhadna dla Rasiei i dla nas — toje robim. Kali nia vyhadna — nia robim. Voś taki padychod».
U prahmatyźmie rasiejskich palitykaŭ sumniavacca nie davodzicca. Ale ci hatovyja rasiejskija palityki pryznać prava na prahmatyzm za svaimi biełaruskimi kalehami? «Mnohim rasiejskim palitykam ciažka zrazumieć, što ŭ Biełarusi taksama mohuć być svaje intaresy. U mnohich palitykaŭ z hetym prablema», — pryznaje A.Milinkievič.
Kozyr A.Milinkieviča ŭ tym, što jon vyčuvaje i vyražaje nastroi biełaruskaj palityčnaj i biznes-elitaŭ. U ich niama rusafobii, ale niama i žadańnia intehracyi. Tym časam sacyjolahi ćvierdziać, što bolšaść biełarusaŭ kaža «tak» siabroŭstvu i z Rasiejaj, i z Eŭraźviazam, ale ćviorda aryjentujecca na niezaležnaść.
«Staŭka na budučyniu moža vyjhrać, — napisaŭ u kamentary sajt «Naša dumka». — Lepiej nie prapanoŭvać Rasieju zamiest Zachadu, ale prapanavać novuju kancepcyju adnosinaŭ i z Rasiejaj, i z Zachadam». (Padrabiaźniej pra dyskusiju na temu rasiejskaje stratehii Abjadnanych demakratyčnych siłaŭ — staronka 4.) Milinkievičavy dumki majuć padobny napramak: «Toje, što z Rasiejaj nam vyhadna mieć dobryja adnosiny, — zrazumieła, — pierakanany jon. — Tolki varjat budzie psavać hetyja adnosiny, kali jany vyhadnyja dla abodvuch bakoŭ».
Ci paśpieŭ Milinkievič nažyć sabie vorahaŭ u Rasiei? «Vorahaŭ u Rasiei ja nia maju, — miarkuje jon. — Z partyjaj ułady treba razmaŭlać», — stavić zadaču Milin- kievič. Razmova taja nia budzie lohkaj. «Ciažka skazać, jak tam vyjdzie. Bajacca jany. Bajacca jany demakratyčnaha ruchu», — kaža adziny kandydat.
Treba adznačyć, što pieršy vizyt A.Milinkieviča ŭ Rasieju ŭ jakaści lidera apazycyi rychtujecca roznymi kiraŭnikami štabu kandydata. Heta pieršaja dla A.Milinkieviča mahčymaść pravieryć na spravie efektyŭnaść pracy štabu.
Ci pavieryć Maskva Milinkieviču? «Chacieŭ by, kab pavieryli, — adkazvaje jon. — Chłusić niavyhadna. Kažuć, što palityka pavinna być na miažy papulizmu. Ja tak nia dumaju. Ja budu absalutna ščyrym. Vydatna, kali jany taksama buduć ščyrymi i zmohuć zrazumieć našy intaresy».
▶
Milinkievič pavinšavaŭ Kačyńskaha
Alaksandar Milinkievič pavinšavaŭ Lecha Kačyńskaha ź pieramohaj na prezydenckich vybarach u Polščy. «Biełarusy i palaki, majučy daŭniuju i supolnuju historyju, jość bratnimi nacyjami. Mienavita tamu dośvied polskaha narodu, jaki 15 hadoŭ tamu pazbaviŭsia tatalitarnaha pryhniotu i dabiŭsia prava svabodna abirać budučyniu, natchniaje nas, biełarusaŭ, siońnia», — havorycca ŭ vinšavańni biełaruskaha palityka. Dniom raniej prezydent Biełarusi A.Łukašenka pavinšavaŭ Ramana Abramoviča ź pieraabrańniem načalnikam Čukotki. Kožnamu svajo.
