Zorkavy čas maładych znaŭcaŭ šachaŭ i mataŭ ź Biełarusi prypaŭ na 2003 hod — Siarhiej Azaraŭ staŭ vice-čempijonam śvietu da 20 hadoŭ, Siarhiej Žyhałka — čempijonam śvietu i Eŭropy da 14 hadoŭ.

Sioleta novaja hieneracyja ajčynnych šachmatystaŭ vystupiła «na Eŭropie» ź mienšym pośpiecham — medaloŭ z Čarnahoryi nie pryvioz nichto. 10-hadovaja Nasta Ziaziulkina apynułasia na pačesnym 5-m miescy, jejnaja pahodka Nataša Kusiankova była 7-j. Prysutnyja dzivilisia z taho, što hetaja vučanica babrujskaha trenera Viktara Zaŭharodniaha ŭmieje zachoŭvać spakoj u lubych pazycyjach. Krychu rasčaravali starejšyja chłopcy i dziaŭčaty. Niekatoryja ź ich zahruźli ŭ nižniaj častcy turnirnaj tablicy, što ź biełarusami naahuł zdarajecca redka. Novapaŭstałaja zorka z Baranavič, 11-hadovy David Chačykian, uziaŭ 4,5 ačka ź dzieviaci — što praŭda, zmahajučysia ŭ hrupie da 14 hod.

Siarod «darosłych» spabornictvaŭ apošniaha času važnaje miesca zajmajuć biełaruska-rasiejski kubak u mienskaj SDIUŠAR-11, bliskuča vyjhrany Jurjem Cichanavym, klubny čempijanat Eŭropy ŭ italjanskim kurortnym miastečku San-Vinsente, na jakim znakamitaja «Viaśnianka» ŭ składzie Siarhieja Azarava, Andreja i Siarhieja Žyhałak, Jaŭhiena Mačałava, Michaiła Hinzburha i Ŭładzimiera Kucankova zaniała 17 miesca z 48-mi. Usio-taki jano davoli ścipłaje ŭ paraŭnańni ź letašniaj «dziasiatkaj».

Uvosień vice-čempijon Biełarusi Jury Cichanaŭ zavajavaŭ apošni hrosmajstarski bał, čempijon Miensku Mikoła Alaŭdzin čarhovy raz vykanaŭ majstarskuju normu. Adnak praviły, pavodle jakich zaćviardžajucca mižnarodnyja zvańni, praduhledžvajuć najaŭnaść peŭnaha rejtynhu: sp.Cichanaŭ jaho maje, sp.Alaŭdzin — pakul nie. Na klubnym čempijanacie kroki da novaha statusu zrabili i braty Žyhałki, i amatar blicu Kucankoŭ. Usio bolš biełaruskich hulcoŭ nazapašvajuć bały majstroŭ dy hrosmajstraŭ. Tendencyja nia moža nia ciešyć — aby kolkaść pierarastała ŭ jakaść.

Клас
Панылы сорам
Ха-ха
Ого
Сумна
Абуральна