11 listapada, u sudzie Pieršamajskaha rajonu Miensku pačniecca razhlad biesprecedentnaj dla Biełarusi spravy. Dva słuchačy FM-ctancyi «Alfa-radyjo» padali ŭ sud na radyjostancyju i jaje prahramnaha dyrektara.

Prahramny dyrektar «Alfa-radyjo» Źmicier Šunin viadzie taksama zabaŭlalnuju prahramu «Kukuruźnik-šoŭ», zbudavanuju na rozyhryšach. U sud źviarnulisia hieroi adnaho z rozyhryšaŭ.

Upieršyniu jon prahučaŭ na «Alfie» dva hady tamu. Tady Šunin patelefanavaŭ u etery adnamu sa słuchačoŭ, pradstaviŭsia načalnikam adździełu pa baraćbie z arhanizavanaj prastytucyjaj i skazaŭ, što siabar hetaha słuchača zatrymany ŭ publičnym domie «Sielski pracaŭnik» — maŭlaŭ, pad zakład 700 tys rub. jon prosicca dadomu. Spačatku słuchač pavioŭsia, ale kali zrazumieŭ, što jaho razyhrali, tolki paśmiajaŭsia i skazaŭ: «Piać bałaŭ!» Zapis rozyhryšu, jak adnaho z samych udałych, «Alfa» paŭtaryła sioleta — pry kancy vieraśnia.

Pamier maralnaj škody, što spryčyniŭ rozyhryš Šunina, acanili ŭ 35 młn rubloŭ. Radyjoviadučy ŭ razmovie z karespandentam «NN» tolki ździŭlajecca: «Jak ja mahu z kaho-niebudź ździekavacca? My, naadvarot, prahramaj namahajemsia paciešyć słuchačoŭ». Šunin śćviardžaje, što pierad tym, jak razyhrać hetaha čałavieka, jon cikaviŭsia ŭ jahonych znajomych pra najaŭnaść u taho pačućcia humaru.

Paśla hetaha Šunina i vyklikali ŭ sud. «Siužet zastaŭsia ŭ bazie, i my jaho pastavili ŭ naš «The Best». Lohika naša była takaja: kali ŭdzielnik rozyhryšu daŭ jamu stanoŭčuju acenku i słuchačy pryznali jaho za ŭdały, dyk čamu b nie paŭtaryć?»

Taciana Padalak, vykładčyca kursu «Prafesijnaja etyka žurnalista» ŭ BDU i žurnalistka hazety «Źviazda», trymajecca inšaha mierkavańnia: «Heta vidavočnaje parušeńnie prafesijnaj etyki. Niaŭžo niechta chacieŭ by apynucca na miescy hetych ludziej? Hałoŭny pryncyp etyki žurnalista — nie naškodź!» Spn.Padalak niekalki razoŭ čuła padobnyja prahramy. «U ich časam parušajecca nia tolki žurnalisckaja, ale j ahulnačałaviečaja etyka!» — kaža jana. Dadatkovaj prykraściu jana ličyć toje, što radyjoviadučy paśmiajaŭsia z hetych słuchačoŭ druhi raz: «Praz dva hady toj słuchač sapraŭdy moža aburycca, bo jaho mahli napatkać roznyja źmieny ŭ žyćci». Tym nia mienš T.Padalak nia suprać isnavańnia padobnych prahram, ale siužety, na jaje dumku, musiać davacca tolki sa zhody tych, kaho razyhrali.

Na ideju «roznych źmienaŭ u žyćci» taksama źviarnuŭ uvahu ŭ interviju radyjo «Svaboda» namieśnik staršyni Biełaruskaj asacyjacyi žurnalistaŭ Andrej Bastuniec, padkreśliŭšy nieadpaviedna vysoki pamier kampensacyi, jakuju patrabuje pazoŭnik: «Heta nie pazoŭ ab abaronie honaru i hodnaści. Najčaściej heta litaralny sposab zarabić niejkija hrošy. Škada, što našyja sudovyja instancyi nijak nie adreahavali na tyja pamiery štrafu, jakija nijakim čynam nie suadnosiacca, naprykład, z tymi vypłatami, jakija spahaniajucca navat pry śmierci čałavieka ci pry surjoznych traŭmach».

Eks-udzielnik kamandy KVK BDU Andrej Dziarkoŭ kaža, što pakul biełaruskija słuchačy nie padrychtavanyja da padobnych rozyhrašaŭ: «U ZŠA takija prahramy majuć daŭniuju historyju, u nas jany źjavilisia niadaŭna i zusim raptoŭna». Sam by Dziarkoŭ nie navažyŭsia takim čynam razyhrać nieznajomaha čałavieka: «Niemahčyma ŭjavić, što ŭ jaho za dušoj, tamu ryzykoŭna žartavać na pryvatnyja temy».

Radyjo-dydžej Adam Starpovič śćviardžaje, što da «spravy Šunina» maje dačynieńnie tolki pytańnie vastryni pačućcia humaru. Ź im pahadžajecca i sam Šunin: «Nie zrazumieć, što heta byŭ rozyhryš, niemahčyma: uvieś tekst prasiaknuty ironijaj, a kali prasłuchać aŭdyjozapis, usie pytańni naahuł adpadajuć».

«Alfa-radyjo» viny nie pryznaje. Pres-słužba radyjo zrabiła zajavu, dzie havorycca, što raniej była viadoma tolki rasiejskaja i zamiežnaja praktyka, kali na papularnyja prahramy padavali ŭ sud u nadziei atrymać peŭnuju hrašovuju sumu. Z.Šunin na pieradsudovych słuchańniach prapanoŭvaŭ achviaram rozyhryšu kampensacyju ŭ pamiery 500 tys. rub., ale tyja nie pahadzilisia. Niezaležna ad rašeńnia sudu, radyjoviadučy maje namier praciahvać vieści «Kukuruźnik-šoŭ», kab «prynosić ludziam zadavalnieńnie».

Aŭdyjozapis rozyhryšu možna prasłuchać tut: http://radio.tut.by/mp3/logger.mp3.

Клас
0
Панылы сорам
0
Ха-ха
0
Ого
0
Сумна
0
Абуральна
0