Płošča 2012...
...i Płošča 2006, 2010...
19 śniežnia spaŭniajecca dva hady z taho dnia, kali 30 tysiač demanstrantaŭ sabrałasia na Płoščy, kab patrabavać svabodnych vybaraŭ. Masavyja aryšty i pieratrusy viarnuli krainu ŭ stan zamarozki, ale praz dva hady paśla hetaha sacyjołahi fiksujuć jašče bolšaje žadańnie pieramien.
Pa-raniejšamu ŭ niavoli zastajucca niepasrednyja ŭdzielniki tych padziej — Mikoła Statkievič i Pavieł Sieviaryniec. Źmicier Daškievič i Eduard Łobaŭ nie dajšli da Płoščy, ale ich spravu nielha razhladać u adryvie ad tych padziej.
Prajšło dva hady, a na mnohija klučavyja pytańni Płoščy pa-raniejšamu niama adkazaŭ. Naprykład, čamu nie znajšli čałavieka, jaki padnosiŭ da Doma ŭrada rydloŭki.Jon zafiksavany na videa i fota. Ci mieła tam miesca spłanavanaja pravakacyja? Milicyja ž zahadzia znachodziłasia ŭ Domie ŭrada, nibyta čakajučy padobnaha raźvićcia padziej.
U toj ža čas, kali pravakacyja mieła miesca, to jana mahła prajści pa tym samym scenary, navat kali manifiestanty rušyli b da Administracyi prezidenta.
Ci mieli lidary Płoščy niejki kankretny płan? Čamu ludski natoŭp, jaki spačatku rynuŭsia da Administracyi, raptoŭna zaviarnuŭ u bok płoščy Niezaležnaści? Chto kiravaŭ tym pachodam, kali bolšaść kandydataŭ vyśviatlała adnosiny z DAIšnikami?
Andrej Sańnikaŭ, jaki sioleta vyjšaŭ z turmy, pakul tak i nie raskazaŭ padrabiaznaści padrychtoŭki i samoj Płoščy. Maŭlaŭ, pakul za kratami zastajucca viaźni — rabić toje rana.
Čamu ŭźnikała havorka pra pieramovy ź Sidorskim? Moža, heta i była taja dezinfarmacyja, na jakuju kupilisia naiŭnyja siarod kandydataŭ?Abo niejkija kantakty z druhim čałaviekam dziaržavy sapraŭdy byli?
Pravakacyi pravakacyjami, ale hałoŭnaje, što Płošča-2010 pakazała: ludzi znoŭ i znoŭ vychodziać na demanstracyi suprać dyktatury.I mienavita hetyja vystupy stanoviacca vyznačalnymi momantami ŭ žyćci krainy. Ich razhon tolki ŭzmacniaje adčuvańnie, što da ludziej nie prysłuchoŭvajucca.
