Žorstka źbiŭ i zakapaŭ: rasśledavana zabojstva školnicy ŭ Staŭbcoŭskim rajonie 5

Va ŭpraŭleńni Śledčaha kamiteta pa Minskaj vobłaści zavieršana rasśledavańnie kryminalnaj spravy ab žorstkim zabojstvie školnicy ŭ Staŭbcoŭskim rajonie, učynienym minułym letam,

paviedamiła aficyjny pradstaŭnik USK pa Minskaj vobłaści Taćciana Biełanoh. Nahadajem, cieła vučanicy 11-ha kłasa Zasulskaj siaredniaj škoły 1996 hoda naradžeńnia było znojdziena 30 červienia ŭ dvary dačnaha doma ŭ vioscy Zasulle. Cieła znachodziłasia ŭ jamie i było prysypana ziamloj. Z 28 červienia školnica znachodziłasia ŭ vyšuku jak bieź viestak źnikłaja.

Pavodle słoŭ Taćciany Biełanoh, na ciele dziaŭčyny ekśpierty znajšli mnostva cialesnych paškodžańniaŭ. Pierad tym jak paciarpiełaja pamierła, jana padvierhłasia žorstkamu źbivańniu.

Padčas apieratyŭna-vyšukovych mierapryjemstvaŭ pa padazreńni va ŭčynieńni złačynstva byŭ zatrymany niepaŭnaletni žychar Staŭbcoŭskaha rajona, 1994 hoda naradžeńnia.

Sa słoŭ zatrymanaha, jon z paciarpiełaj razam bavili čas u lasnym masivie. Paśla ŭźnikłaj svarki, budučy ŭ stanie ałkaholnaha apjanieńnia, jon źbiŭ i zadušyŭ dziaŭčynu, paśla čaho jaje trup zakapaŭ.

Jak zaznačyła Biełanoh, u vyniku rasśledavańnia pa spravie ŭ dačynieńni da padazravanaha sabrany dastatkovyja dokazy jaho vinavataści va ŭčynieńni złačynstva i jamu vystaŭleny abvinavačańni na padstavie p. 6 č. 2 art. 139 KK (zabojstva, učynienaje z asablivaj žorstkaściu).

Zaraz materyjały kryminalnaj spravy USK pa Minskaj vobłaści pieradadzieny prakuroru dla nakiroŭvańnia ŭ sud.

Viačasłaŭ Budkievič, BiełaPAN.

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH