Padazravany ŭ źbivańni invalida ŭ vahonie mietro adpuščany pad nahlad baćkoŭ 12

14 studzienia prakuratura admoviła ŭ źmiaščeńni pad vartu hałoŭnaha padazronaha ŭ źbivańni invalida ŭ vahonie staličnaha mietrapalitena. Śledčymi orhanami pryniata rašeńnie adpuścić minčanina 1995 hoda naradžeńnia ź IČU pad nahlad baćkoŭ.

Pra heta BiełaPAN paviedamiŭ aficyjny pradstaŭnik upraŭleńnia Śledčaha kamiteta Biełarusi pa Minsku Alaksandr Hierasimaŭ.

11 studzienia Partyzanskim rajonnym adździełam SK u dačynieńni da maładoha čałavieka była raspačata kryminalnaja sprava za chulihanstva na padstavie častki 1 artykuła 339 Kryminalnaha kodeksa. Pa spravie dapytany siem śviedak.

Pravodziacca śledčyja mierapryjemstvy pa ŭstanaŭleńni roli ŭ hetym kanflikcie brata padazronaha 1996 hoda naradžeńnia. Pra rolu dziaŭčyny śledčyja pakul nie havorać.

Nahadajem, 2 studzienia, viartajučysia ŭ supravadžeńni sastarełaj maci damoŭ, 40-hadovy minčanin, invalid pieršaj hrupy, zajšoŭ u vahon mietro i paprasiŭ adnaho z maładych ludziej sastupić miesca, bo jamu ciažka stajać (prablemy z aporna-ruchalnym aparatam). Adnak u adkaz chłopiec vydaŭ patok niecenzurnaj łajanki. Anałahičnaja reakcyja była i z boku dziaŭčyny, jakaja siadzieła pobač. Invalid źbiraŭsia adyści ŭbok, ale małady čałaviek razam ź siabram nakinuŭsia na jaho z kułakami. Na praciahu niekalki chvilin jany źbivali biezabaronnaha mužčynu, nanosiačy jamu množnyja ŭdary rukami i nahami pa hałavie, tvary i ciele. Paśla hetaha jany kinuli paciarpiełaha na padłozie vahona i razam sa spadarožnicaj vyjšli na stancyi «Płošča Pieramohi».

Paciarpieły znachodzicca ŭ balnicy. Uračy pastavili jamu dyjahnaz «čerapna-mazhavaja traŭma siaredniaj stupieni». Na ciele i tvary mužčyny vyjaŭleny množnyja hiematomy, siniaki i ranki.

Padčas praviedzienych śpiecmierapryjemstvaŭ vyśvietliłasia, što kampanija, jakaja pajšła ŭ nieviadomym napramku, trapiła ŭ ab`iektyŭ kamier videanazirańnia.

Ustanavić asoby chulihanaŭ milicyi dapamahli internet-karystalniki. Prośba da hramadzian ab dapamozie va ŭstanaŭleńni vinavatych u źbivańni invalida była apublikavana ranicaj 10 studzienia na sajcie HUUS Minharvykankama. U paviedamleńni ŭtrymlivalisia fota i videazapis, na jakich vyjaŭleny padazronyja.

Praź niekalki hadzin paśla abnarodavańnia hetaj infarmacyi internet-karystalniki znajšli asabistyja staronki vierahodnych padazronych u sacyjalnaj sietcy «UKantakcie». Spasyłki na hetyja staronki pastupili na sajt perehvat.gov.by (sajt internet-prajekta HUUS «Pierachop»), paśla čaho atrymanaja infarmacyja była pieradadziena apieratyŭnikam.

Potym było dakładna ŭstanoŭlena, što z troch nazvanych asob da padziej u mietrapalitenie maje dačynieńnie tolki adna. Adnak nieŭzabavie na sajt «Pierachop» pastupiła ananimnaje paviedamleńnie, u jakim utrymlivałasia infarmacyja ab dvuch inšych mahčymych padazronych.

Ranicaj 11 studzienia ŭsie padazronyja byli zatrymany i dastaŭleny ŭ Partyzanskaje RUUS dla praviadzieńnia pravieračnych mierapryjemstvaŭ.

Viačasłaŭ Budkievič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH