Vasil Saročyk prosić adnavić kryminalnuju spravu da supracoŭnikaŭ Leninskaha RUUS

Vartaŭnik minskaj aŭtastajanki Vasil Saročyk 14 studzienia abskardziŭ u haradskoj prakuratury Minska pastanovu ab spynieńni kryminalnaha pieraśledu i rasśledavańnia pa kryminalnaj spravie ŭ dačynieńni da supracoŭnikaŭ Leninskaha RUUS stalicy, jakija, mahčyma, brali ŭdzieł u jaho źbivańni.

Pra heta paviedamiŭ kiraŭnik pravaabarončaj arhanizacyi Platform Innovation Andrej Bandarenka.

Pavodle jaho słoŭ, u tekst skarhi Saročyka ŭvajšła ekśpiertyza jurystaŭ hetaj arhanizacyi, jakaja zvodzicca da taho, što «orhan kryminalnaha pieraśledu nie pryniaŭ usich praduhledžanych zakonam mier pa ŭsiebakovym, poŭnym i ab`iektyŭnym daśledavańni akaličnaściaŭ kryminalnaj spravy, z-za čaho pryjšoŭ da nieabhruntavanaj vysnovy ab adsutnaści sastavu złačynstva ŭ dziejańniach supracoŭnikaŭ AKV Leninskaha RUUS Minska».

Nahadajem, u kancy śniežnia stała viadoma, što kryminalnaja sprava ŭ dačynieńni da supracoŭnikaŭ Leninskaha RUUS Minska, udzielnikaŭ incydentu z Vasilom Saročykam, spyniena.

Incydent adbyŭsia 14 listapada. Pavodle słoŭ Saročyka, u punkt achovy aŭtastajanki pryjšli dva supracoŭniki pravaachoŭnych orhanaŭ, adzin ź jakich byŭ u cyvilnym. Nie prad`iaŭlajučy dakumientaŭ i ničoha nie tłumačačy, jany zahadali vartaŭniku nakiroŭvacca ŭ Leninskaje RUUS. Kala hadziny Saročyk znachodziŭsia ŭ pamiaškańni dziažurnaj čaści ŭpraŭleńnia, a zatym jaho adviali na dopyt. Paźniej vyśvietliłasia, što dopyt pravodziła opierupaŭnavažanaja Leninskaha RUUS Bahdanoŭskaja Ž. P. Pavodle słoŭ Saročyka, opierupaŭnavažanaja nadzieła na jaho naručniki i stała źbivać, patrabujučy pryznacca ŭ kradziažy nadmahilnych plit, jakija zachoŭvalisia na terytoryi aŭtastajanki, a taksama salarki i akumulataraŭ z mašyn. Akramia taho, ad vartaŭnika sprabavali dabicca pryznańnia ab tym, što jon pieryjadyčna rabavaŭ kijoski na rynku «Śviełta».

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH