Hienieralny dyrektar "Biełaruś-3" Viktar Majučy.

Hienieralny dyrektar "Biełaruś-3" Viktar Majučy.

Siońnia ŭ 7.50 pačałosia viaščańnie novaha telekanała Biełteleradyjokampanii.
«Biełaruś-3» budzie vykonvać tuju ž funkcyju, što i rasijskaja «Kultura». Pieršaj pieradačaj staŭ film «Horackija paciechi» z cykłu «Ziamla Biełaruskaja».
Paśla vystupu viadučaj Irynaj Maisiejevaj pajšoŭ i pieršy rasiejskamoŭny film: «Jurij Tarič. Načało».
Karacieńkaja biełaruskamoŭnaja pieradača «Słaŭco» źmienicca nastupnym rasiejskamoŭnym filmam «Puť k śvietu. Anatolij Baranovskij».

* * *

«Naša Niva» nahadvaje historyju stvareńnia kanała i inšyja cikavostki, źviazanyja ź im.

Sport ci kultura?

Pieršyja razmovy pra maštabnyja pieraŭtvareńni ŭ struktury BT pačalisia ŭletku 2011 hoda. Staršynia Biełteleradyjokampanii Hienadź Davydźka vyrašyŭ pakinuć svajo imia ŭ historyi.

Pieršy telekanał musiŭ być pierajmienavany ŭ «Biełaruś-1», kanał «ŁAD» — u «Biełaruś-2», mižnarodny «Biełaruś-TB» — u «Biełaruś-24». Navinkaj efiru nazyvaŭsia spartyŭny kanał «Biełaruś-3».

Praź niekalki miesiacaŭ pryjarytety źmianilisia, i ideju stvareńnia vyklučna spartyŭnaha kanała było vyrašana adkłaści.

Ź ciaham času była vypracavana novaja stratehija — ŁAD («Biełaruś-2») zrabić zabaŭlalna-spartyŭnym, a historyju i kulturu vynieści ŭ farmat «Biełaruś-3».

Źmiena kancepcyi kanała

Pavodle letašnich zajavaŭ Hienadzia Davydźki,

«Biełaruś-3» musiŭ abjadnaje ŭvieś kantent, jaki padychodzić pad vyznačeńnie «Spadčyna» (heta pracoŭnaja nazva). «U efiry źjaviacca novyja prajekty pra kulturu, historyju, šedeŭry suśvietnaha kino — i ŭsio budzie tolki na biełaruskaj movie», —
paabiacaŭ Davydźka.

«Heta budzie biełaruskamoŭny telekanał, dzie budzie pradstaŭlena lepšaja dakumientalistyka, histaryčnyja filmy, dasiahnieńni suśvietnaha kiniematohrafa, dublavanyja na biełaruskuju movu, tok-šou kulturałahičnaha płanu, relihijnyja prahramy, prahramy dla dziaciej, školnikaŭ», — udakładnili tady ŭ pres-słužbie Biełteleradyjokampanii.

Prajšoŭ hod, i akcenty znoŭ źmianilisia.

Ciapier hałoŭnaj metaj «Biełaruś-3» nazyvajuć «aśviatleńnie dziaržaŭnaj infarmacyjnaj palityki ŭ halinie kulturnaha žyćcia krainy».
Kancepcyja «Spadčyny» zamianiłasia na kancepcyju «Kultura i mastactva». Zamiest 100% biełaruskaj movy zastałosia «kala 70%». «Na siońnia sietka viaščańnia składajecca prykładna na 70% ź biełaruskamoŭnych prahram. My nie pavinny zabyvać pra dvuchmoŭje ŭ nas u krainie i pra dźvie dziaržaŭnyja movy. Abjektyŭna hety kanał nie moža być tolki biełaruskamoŭnym. Naturalna, buduć prysutničać prahramy i na ruskaj movie», — tłumačyć dyrektar «Biełaruś-3» Viktar Majučy.
Słohanam kanała stanie fraza «Kab lubić Biełaruś».

Kiraŭnictva

Uznačaliŭ «Biełaruś-3» mienavita jon, Viktar Majučy. Dahetul jon pracavaŭ u Ministerstvie infarmacyi va ŭpraŭleńni elektronnych ŚMI. Na mnohich kanfierencyjach Majučy vystupaje jak načalnik adździeła Infarmacyjna-analityčnaha centra pry Administracyi prezidenta.

U Majučaha dźvie adukacyi — jon zakončyŭ historyka-fiłałahičny fakultet Homielskaha dziaržaŭnaha univiersiteta (1983) i Mižnarodnuju akademiju mieniedžmientu (2005).
Z 1985 pa 2006 hod pracavaŭ u struktury Biełteleradyjokampanii.

Na pytańnie «NN», ci svabodna jon vałodaje biełaruskaj movaj, Majučy adkazaŭ: «Vałodaju». Anatol Jarmolenka ŭdakładniŭ, što zaśpieŭ toj čas, kali

Majučy vioŭ moładzievuju prahramu «Krok» pa-biełarusku,
i nahadaŭ, što biełaruskamoŭnyja prahramy Majučaha na homielskim telebačańni byli adznačanyja na roznych konkursach.

Namieśnik dyrektara — Siarhiej Makarej. Jon vykładaje majsterstva hukarežysiora ŭ Biełaruskaj dziaržaŭnaj akademii mastactvaŭ.

Pieršy ličbavy kanał Biełarusi

«Kanał „Biełaruś-3“ budzie tolki ličbavym», — tłumačyć Viktar Majučy.
U ličbavym varyjancie jon zajmaje miesca pryvatnaha «8 kanała».

Dla taho, kab hladzieć «Biełaruś-3», treba mieć televizar, jaki padtrymlivaje DVB-T (bolšaść novych madelaŭ), albo ŭstaloŭvać śpiecyjalnuju prystaŭku. Miarkujecca, što hetyja prystaŭki buduć prapanoŭvacca abanientam pa dastupnaj canie ci ŭvohule ŭ biaspłatnuju arendu, ale kančatkova hetaje pytańnie nie vyrašana.

Pa słovach Majučaha, pieramovy z apieratarami kabielnaha telebačańnia (nakštałt Kosmas TB) viaducca, jak i z apierataram IP-telebačańnia Zala.

A voś MTIS užo ŭklučyŭ kanał u sietku testavaha ličbavaha viaščańnia.

Złavić ža «Biełaruś-3» zvyčajnaj antenaj u vioscy nie atrymajecca. Anałahavuju častatu jon nie maje.

Što budzie ŭ efiry?

Toje, jakija pieradačy buduć tranślavacca ŭ pieršyja dni pracy kanała, užo viadoma. Heta dakumientalnyja filmy, prahramy «Razmaŭlajem pa-biełarusku» i «Kałychanka». Darečy,

«Kałychanka» pavialičycca pa časie da 20 chvilin, i stanie štodzionnaj. Dahetul pa vychodnych jana nie vychodziła.

Kolkaść pieradač budzie pavialičvacca, čakajecca, što na «Biełaruś-3» piarojduć «Błahoviest» i «Tajamnicy dušy».

Zhodna z pres-relizam Biełteleradyjokampanii, asnovu efiru budnych dzion składzie padborka krajavidnych filmaŭ pad nazvaj «Maja Biełaruś». Aproč ich, buduć tranślavacca prahramy, abjadnanyja ŭ nastupnyja rubryki: «Teatr», «Kino», «Litaratura», «Muzyka», «Asoby», «Historyja», «Kalarovy śviet», «Pryroda», «Tradycyi», «Dojlidstva», «Navuka», «Muziei».

«My budziem rabić upor nie na estradu, a na muzyku inšych žanraŭ, jakija taksama vielmi paśpiachova raźvivajucca ŭ Biełarusi, a muzyki, jakija pracujuć u hetych žanrach, viadomyja va ŭsim śviecie. I, naturalna, źviartacca da toj muzyki, jakaja vyjšła z estrady, ale ŭžo stała narodnaj, moža być, nie pa žanru, a pa duchu», — paabiacaŭ Majučy.

A voś z tranślacyjaj teatralnych pastanovak budzie składaniej. Pa słovach Majučaha, hetaje pytańnie ŭpirajecca ŭ pytańni aŭtarskich pravoŭ i biznesu, jaki nie zaŭsiody zacikaŭleny ŭ tyražyravańni premjernych śpiektaklaŭ na telebačańni.

Pa mierkavańni dyrektara,

błokavaj rekłamy, jakaja isnuje na inšych kanałach być nie pavinna. Ale i zusim biez rekłamy nie abyścisia.

Nahadajem, pieršaje ŭklučeńnie «Biełaruś-3» adbudziecca 8 lutaha ŭ 7.50.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?