Kab praściej ujaŭlać situacyju, voźmiem, da prykładu, dźvie siamji, jakija žyvuć u zvyčajnych kvaterach.

Adna, Ivanoŭskich, karystajecca ličylnikam pa dyfierencyjavanych taryfach, a druhaja, Subačaŭ, — tradycyjnym adnataryfnym. I praviadziem razam ź imi ŭmoŭnyja raźliki.

Dapuścim, Ivanoŭskija i Subačy ŭ siarednim za miesiac spažyvajuć pa 180 kiłavat u hadzinu elektraenierhii za miesiac.

Jak paviedamiŭ dziaržaŭny inśpiektar Vilejskaha enierhanahladu Ihar Misiul, u Vilejcy i Miadzieli za 2012 hod siaredniamiesiačnaje spažyvańnie elektraenierhii zarehistravanymi abanientami składaje 81 kVt/h. Nizki ŭzrovień hetaha pakazčyka tłumačycca tym, što paniaćcie «zarehistravany abanient» uklučaje ŭ siabie nie tolki zvyčajnych spažyvalnikaŭ — najmalnikaŭ ci haspadaroŭ ułasnaha žylla, — ale i tych, chto zarehistravaŭ svoj prybor uliku na dačy ci ŭ haražy. Tam najčaściej raschod enierhii nievysoki.

Taryf, pa jakim Subačy płacili i buduć płacić dalej sa zvyčajnym ličylnikam, — 382,4 rubla za kiłavat u hadzinu.

A dla dvuchtaryfnych ličylnikaŭ u Ivanoŭskich taryfy ŭžo inšyja: u budni z 22.00 da 17.00 — 267,7 rubla, i ad 17.00 da 22.00 — 764,8 rubla. Pa vychadnych i śviatočnych dniach dziejničaje minimalny taryf — 267,7 rubla za kVt/hadzinu. U miesiacy zvyčajna 22 pracoŭnyja dni i 8 vychadnych.

Ciapier raźličym, kolki budzie płacić siamja Subačaŭ sa zvyčajnym ličylnikam i Ivanoŭskich — z šmattaryfnym.

Ivanoŭskija — dvuchtaryfny ličylnik

Ivanoŭskija raźličvajucca za spažytuju elektraenierhiju pa dyfierencyjavanym taryfie. Udzień jany znachodziacca na pracy. U siarednim traciać 180 kiłavat za miesiac.

Za sutki — 6. Niachaj, 2 kiłavaty dniom, pa nižejšym taryfie, i 4 uviečary, pa bolšym.

2×267,7×22=11 780 (rabočyja dni, min.)

6×267,7×8=12 850 (vychadnyja dni)

4×764,8×22=67 300 (rabočyja dni, maks.)

«Tannych» kiłavat Ivanoŭskija spažyvajuć na 24 630 rubloŭ, a «darahich» — na 67 300.

Usiaho — 91 930 rubloŭ za miesiac.

Subačy — adnataryfny ličylnik

Pahladzim, kolki zapłaciać Subačy, jakija karystajucca zvyčajnym adnataryfnym ličylnikam i spažyli enierhii stolki ž, kolki i Ivanoŭskija.

Pavodle novych praviłaŭ, z 1 lutaha Subačy apłačvajuć 150 kiłavat pa taryfie 382,4 rubla za kiłavat u hadzinu. Usio, što zvyš 150, raźličvajecca z papravačnym kaeficyjentam 1,3, abo pa 497,1 rubla za kiłavat u hadzinu.

150×382,4=57 360

30×497,1=14 910

Atrymlivajecca 72 270 rubloŭ.

Dla siamji Subačaŭ, jakija spažyvajuć, jak i Ivanoŭskija, i ŭ takim samym režymie, pa 180 kVt, zvyčajny ličylnik akazaŭsia bolš vyhadnym.

Adnak treba zrazumieć, što kali kolkaść spažytaj enierhii Ivanoŭskimi i Subačami budzie inšaj i suadnosiny spažyvańnia ŭ roznyja časy sutak źmieniacca, to vyhadnymi mohuć być i dvuchtaryfnyja ličylniki.

Kali b našy hieroi spažyvali, naprykład, 500 kiłavat u hadzinu za miesiac i asnoŭnyja traty Ivanoŭskich (75%) prypali na «tanny» pieryjad, to Subačam by naličyli 300 tysiač 265 rubloŭ, a aščadnym Ivanoŭskim — 195 tysiač 988 rubloŭ.

Čamu tak atrymałasia? Pry spažyvańni enierhii bolš čym 300 kiłavat u hadzinu na praciahu miesiaca, raźliki ŭžo viaducca pa taryfie 841,7 rubla. A jak Ivanoŭskija ŭmudrylisia tracić asnoŭnuju masu enierhii u čas «tannaha» taryfu? Mabyć, ustalavali takija štučki, jak elektronny prahramatar, jaki padklučaje ichniuju maraziłku i inšyja enierhajomistyja prybory tolki ŭ čas, kali enierhija nie tak bje pa kišeni.

Zaležnaść apłaty elektraenierhii ad vybranaha ličylnika

Varyjant «A» — 25% enerhii spažyta pa vyšejšym taryfie, 75% — pa nižejšym.

Varyjant «B» — spažyta enierhii pa abodvuch dyfierencyjavanych taryfach paroŭnu (pa 50%).

Čas elektronnych ličylnikaŭ

Ciapier, kali budujucca novyja damy ci robiacca kapitalnyja ramonty, pieravažna ŭstaloŭvajucca elektronnyja ličylniki, jakija mohuć pracavać jak u adnataryfnym, tak i šmattaryfnym režymach.

Kali vy chočacie pierajści na dyfierencyjavany taryf, to vam nieabchodna źviarnucca ŭ Enierhazbyt. Tam vy napišacie zajavu pa źmienie taryfu, i praź niekatory čas vam zaprahramujuć novy taryf. Heta pracedura biaspłatnaja.

Dzie nabyć elektronny ličylnik

Kali, pavodle padlikaŭ, elektronny ličylnik vam usio ž padydzie bolš, to nabyć jaho možna samastojna — košt kala 500 tysiač rubloŭ.

Jaho apraŭdana nabyvać tolki ŭ tym vypadku, kali asnoŭnaje spažyvańnie enierhii ŭ vas prypadaje nie na viečar budniaŭ.

Enierhanahlad adkazvaje na pytańni

Ci ŭpłyvajuć płošča kvatery i kolkaść žycharoŭ na vieličyniu taryfu?

Dyfierencyjavanaja apłata elektraenierhii i hazazabieśpiačeńnia budzie zaležać ad abjomaŭ ich spažyvańnia. Ni kolkaść zarehistravanych hramadzian u žyłych damach ci kvaterach, ni płošča, ni kolkaść pakojaŭ roli nie adyhryvajuć.

Kolki treba płacić pry adsutnaści elektraličylnika?

Kali žyłyja damy abo kvatery nie abstalavanyja pryborami indyvidualnaha ŭliku raschodu elektryčnaj enierhii, to z 1 lipienia płata za pasłuhi elektrazabieśpiačeńnia budzie spahaniacca pa taryfach, što zabiaśpiečvajuć poŭnaje pakryćcio ekanamična abhruntavanych zatrat na ich akazańnie. Z hetaha miesiaca jany składajuć 841,7 rubla za kVt/hadzinu.

Kolki płacić u zaharadnych damach i pustych kvaterach?

U zaharadnych damach, a taksama kvaterach, u jakich nichto nie zarehistravany, apłatu nieabchodna rabić pa pakazańniach raźlikovaha prybora ŭliku elektraenierhii pa taryfach u zaležnaści ad ustalavanaj plity — hazavaj ci elektra.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?