U hetym hodzie arhanizatram užo nie treba było šukać ekskursavodaŭ, jany sami telefanavali i prapanoŭvali svaje maršruty.
U niekatorych abłasnych haradach znajšlisia inicyjatary, jakija ŭziali na siabie padrychtoŭku i kaardynacyju ekskursij i navat mini-festaŭ u svaich miascovaściach.
Da nas dałučyłasia inicyjatyŭnaja hrupa prajekta «Dotyk da Minska» z prapanovaj sumiesnaj raspracoŭki ekskursij dla ludziej z abmiežavanymi mahčymaściami, ravarysty z Bresta prapanavali pravieści ŭ miežach akcyi viełaprabieh z ekskursijaj pa fartach Bresckaj krepaści.
U hetym hodzie «Fest» padtrymaŭ Departamient pa turyzmu Ministerstva sporta i turyzma Biełarusi.

U Minsku za 2 dni prajšło 57 ekskursij. Byli tradycyjnyja maršruty, takija jak Płošča Niezaležnaści, Dubrava Čapskaha, Minsk Tatarski. Byli zusim novyja cikavyja temy: upieršyniu praviedziena ekskursija pa miaścinach Stanisłava Maniuški z zaviaršalnym mini-kacertam ad hurta Doux Souvenir, pa adrasach minskich fotamajsterniaŭ XIX — pač. XX st., pa architektury minskaha «stalinskaha ampiru», pa Kastryčnickaj płoščy i šmat inšych.

U hetym hodzie ŭ Minsku prajšło ažno 3 ekskursii, śpiecyjalna raspracavanyja dla dziaciej: pa biblijatecy imia Astroŭskaha, pa Trajeckim pradmieści i Łošyckim parku.
U Łošyckim parku animcyja ekskursii była realizavanaja dziakujučy narodnamu litaraturnamu teatru «Žyvoje słova» (BDPU imia M. Tanka).

Viełasipiedysty taksama nie adstavali. Akramia bresckaj ekskursii u amataraŭ rovaraŭ była mahčymaść prajechać pa Viaśniancy i pa miaścinach Karala Čapskaha, a taksama paznajomicca ź cikavostkami Zasłaŭja (hetaja ekskursija ładziłasia turystyčnym pradpryjemstvam Greenteam).

U miežach «Festa ekskursavodaŭ» dziakujučy inicyjatyvie «Dotyk da Minska» upieršyniu była praviedziena ekskursija dla ludziej z prablemami zroku, a taksama intehravanaja ekskursija dla ludziej z prablemami aporna-ruchalnaha aparata.

Niekalki ekskursij, jakija prachodzili ŭ mikrarajonach, byli prarekłamavanyja pry dapamozie miascovych ŽESaŭ śpiecyjalnymi papiarovymi abviestkami, tamu na ich taksama pryjšło dosyć šmat narodu, pryčym mienavita žycharoŭ hetych mikrarajonaŭ. Ahulnaja kolkaść ludziej, jakija naviedali ekskursii ŭ Minsku ŭ hetyja 2 dni, — kala 1800 čałaviek. Heta vialikaja kolkaść navat dla 57 maršrutaŭ, ale ekskursavody mocna staralisia, kab usie ich dobra pačuli.

Tradycyjna dobra pastavilisia da praviadzieńnia ekskursij i nastajacieli minskich chramaŭ, bolšaść ź jaki rasčyniła svaje dźviery dla cikaŭnych mienčukoŭ.

Z rehijanalnych haradoŭ najbolš aktyŭna prajaviła siabie Hrodna, dzie prajšło 12 ekskursij. Cikavaja taksama atrymałasia prahrama ŭ Połacku, Viciebsku, Homieli, Słucku. Asabliva chaciełasia b adznačyć Brest, jaki tak aktyŭna padklučyŭsia ŭpieršyniu i dzie prajšło 5 ekskursij, siarod jakich viełaprabieh na 250 čałaviek! Taksama prajšli ekskursii jašče ŭ 2 dziesiatkach haradoŭ i miastečak Biełarusi. Ahułam ekskursii ŭ rehijonach naviedała kala 650 zacikaŭlenych asobaŭ.

Arhkamitet vykazvaje padziaku ŭsim ekskursavodam za ich udzieł u Feście, vałancioram, jakija vielmi dapamahli ŭ arhanizacyi i praviadzieńni ekskursij, turystyčnym pradpryjemstvami Greemteam, Tandem Tur, Miercana za udzieł u padrychtoŭcy i praviadzieńni ekskursij.
Tvorčym kalektyvam Doux Souvenir teatru «Žyvoje słova», Alaksandru Hałkoŭskamu i Viery Pakłonskaj za ŭpryhožvańnie i teatralnaje napaŭnieńnie niekatorych ekskursij.

Asobnaja vialikaja padziaka — kampanii «Kalarovy kot» za razdrukoŭku paštovak.

Dziakuj usim arhanizatram i ekskursavodam u rehijonach.

Dziakuj vijaliki ŭsim! My spadziajemsia, što ŭsie hetyja ekskursii dapamahli žycharam biełaruskich haradoŭ i miastečak krychu bližej paznajomicca z tymi budynkami, płoščami, łanšaftami, chramami, praśpiektami, pałacami i siadzibami, pobač ź jakimi jany žyvuć i chodziać kožny dzień.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?