Najmaładziejšy ŭ administracyi

Słovy Alaksandra Łukašenki pra amaładžeńnie kadraŭ nie zastalisia pustymi. 10 červienia stała viadoma pra niečakanaje kadravaje rašeńnie. Pamočnikam prezidenta pa ekanomicy pryznačany 35-hadovy Kirył Rudy.

Da hetaha pasadu zajmali adyjozny Siarhiej Tkačoŭ, jaki syšoŭ u «Amkador», i piensijanier Piatro Prakapovič, jakoha pavysili ŭ vice-premjery.

Kirył Rudy budzie najmaładziejšym u vyšejšych ešałonach ułady. Ale nie heta samaje redkaje. Jon pryjšoŭ na vysokuju pasadu nie z kazarmaŭ i nie z vykankamaŭskich kabinietaŭ. Pierš čym trapić va ŭładu, Rudy zrabiŭ vydatnuju navukovuju karjeru. Kandydatam navuk staŭ užo ŭ 23 hady, a doktaram — u 33.

Navukovyja zacikaŭlenaści Rudaha — finansy, kredyty, finansavyja kryzisy. Jon aŭtar niekalkich navučalnych dapamožnikaŭ. Voś śpis jahonych publikacyj.

«Źniešnieekanamičnaja raŭnavaha i finansavyja miechanizmy jaje farmiravańnia ŭ krainach z tranzityŭnaj ekanomikaj», — tak hučała tema jahonaj doktarskaj. Navukovym kanstultantami pracy byŭ rektar BHEU, były ministr ekanomiki Uładzimir Šymaŭ. Niejki čas byŭ namieśnikam dekana ŭ «alma mater».

Stažyravaŭsia ŭ ZŠA
Kirył Rudy byŭ stypiendystam prahramy Fułbrajta, jakaja finansujecca ŭradam ZŠA, i nakiravanaja na praviadzieńnie navukova-daśledčaj raboty ŭ adnym z univiersitetaŭ Amieryki. Na praciahu čatyroch miesiacaŭ biełarus stažyravaŭsia ŭ Čykaha. Kazaŭ, što jaho vybrali na prahramu, bo «ŭziaŭ usich svajoj maładościu, zapałam i kamunikabielnaściu».

Pracavaŭ u Čykaha nad «płanam finansavaj stabilizacyi krain SND». Adrazu ž skazaŭ, što źjazdžać u Štaty nazaŭsiody jon nie źbirajecca, tak i vyjšła.

Viadoma, što jon žanaty. U pašparcie pišacca łacinkaj Kiryl Rudy. Ale žonka ŭ pašparcie ŭžo Elena Rudaja, a nie Alena, jak naležyć pa-biełarusku.

Bahdankievič: «Tałkovy, hramatny, sučasny»
Kirył Rudy abaraniŭ kandydackuju ŭ 2001 hodzie ŭ «narhasie». Tema — «Miechanizm vybaru režymu abmiennaha kursu». Navukovym kiraŭnikom byŭ prarektar BHEU Mikałaj Zajac. Apanientam pry abaronie byŭ prafiesar Stanisłaŭ Bahdankievič.

Hanarovy staršynia AHP uzhadvaje pra Kiryła Rudaha: «Mocny student, paśpiachova abaraniŭ kandydackuju. Tałkovy, hramatny, sučasny, padrychtavany, pracavity. Kali da jaho buduć prysłuchoŭvacca, to heta vielmi dobra. Takich ludziej i treba ŭciahvać va ŭładu. Razam z tym, treba mianiać sistemu. Inakš navat takich ludzi, jak Rudy buduć uvieś čas zastavacca „na pabiahuškach“. U Łukašenki nie było paŭhoda pamočnika pa ekanomicy? A Miaśnikovič chiba nie pamočnik?» — iranizuje sp. Bahdankievič.

Kitaj
Niekalki apošnich hadoŭ Kirył Rudy pracavaŭ ekanamičnym daradcam u pasolstvie Biełarusi ŭ Kitai. U svaich navukovych pracach Rudy pisaŭ pra «ŭzmacnieńnie ŭpłyvu KNR u śviecie». «Niahledziačy na składanaść kitajskaj movy, u apošnija hady jaje papularnaść u śviecie raście, što najpierš źviazana z rostam i nieabchodnaściu ekanamičnaha supracoŭnictva z Kitajem».

Što datyčyć samoj pracy, to tut infarmacyi nie tak šmat. Viadoma, što Kirył Rudy vioŭ z kitajskim Dziaržbankam ab supracoŭnictvie ź Biełaruśsiu. Braŭ udzieł u raspracoŭcy prajekta kitajska-biełaruskaha industryjalnaha parka, što maje paŭstać pad Smalavičami.

Biznes
Pierad pryznačeńniem u Administracyju Rudy krychu papracavaŭ u biznesie. Apošnim časam jon źjaŭlaŭsia namieśnikam hiendyrektara biełaruska-kitajskaha pradpryjemstva «Bieł Chuavej Tiechnoładžys». Prynamsi, sioleta ŭ sakaviku ahučvaŭ ideju stvareńnia smartfonaŭ, jakija buduć pradavacca pad brendam «Haryzonta».
Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?