«Pytańnie admieny śmiarotnaj kary lažyć nie ŭ prahmatyčnaj płoskaści, a ŭ maralna-duchoŭnym aśpiekcie, jano vychodzić daloka za miežy prava»,
— zajaviŭ staršynia pastajannaj kamisii pałaty pradstaŭnikoŭ pa mižnarodnych spravach, kiraŭnik parłamienckaj pracoŭnaj hrupy pa vyvučeńni prablematyki śmiarotnaj kary Mikałaj Samasiejka, vystupajučy 21 červienia ŭ Minsku na kruhłym stale «Relihija i śmiarotnaja kara». Mierapryjemstva pravodzicca Radaj Jeŭropy ŭ supracoŭnictvie ź biełaruskimi ŭładami.

«Pytańnie admieny śmiarotnaj kary vielmi aktualnaje, na praciahu historyi hramadstva jaje prymianieńnie zaŭsiody vyklikała haračyja sprečki, praciahvajucca jany i ciapier», — kanstatavaŭ Samasiejka.

Jon adznačyŭ, što siońniašni kruhły stoł važny tym, što daść mahčymaść usim bakam jašče raz abmianiacca mierkavańniami pa hetym značnym pytańni.

«Nam važna viedać, jakija słai hramadstva jak staviacca da śmiarotnaj kary i da jaje admieny, važna viedać mierkavańnie relihijnych kanfiesij pa hetym pytańni», — skazaŭ deputat.

U svaju čarhu hienieralny dyrektar pa pravach čałavieka i viaršenstvie prava Rady Jeŭropy Filip Buaja adznačyŭ, što try hady tamu byŭ u Minsku i abmiarkoŭvaŭ pytańni, jakija tyčacca admieny śmiarotnaj kary.

«Reakcyja ŭ cełym była pazityŭnaj, i ja pakidaŭ Minsk pierapoŭnieny nadziejami», — skazaŭ Buaja.
Adnak, «sa škadavańniem» kanstatavaŭ jon, za minuły čas u Biełarusi byli vyniesieny novyja śmiarotnyja prysudy, niekatoryja ź ich pryviedzieny ŭ vykanańnie.
«Biełaruś źjaŭlajecca častkaj Jeŭropy, usie my ź nieciarpieńniem čakajem, kali Biełaruś prymie adpaviednyja miery i zmoža pa pravie zaniać svajo miesca ŭ jeŭrapiejskaj siamji.
— skazaŭ jon. — My razumiejem, što praces admieny śmiarotnaj kary patrabuje času i aktyŭnaha ŭdziełu palityčnych dziejačaŭ, jakija časam musiać iści nasupierak hramadskaj dumki».

Kiraŭnik pradstaŭnictvaŭ Jeŭrasajuza ŭ Biełarusi Majra Mora padkreśliła, što ES zajmaje pryncypovuju pazicyju pa hetym pytańni i zaklikaje ŭsich da admieny śmiarotnaj kary.

«ES ličyć śmiarotnuju karu žorstkim i biesčałaviečnym pakarańniem, jakoje pry hetym nie pieraškadžaje strašnym złačynstvam»,
— skazała jana. Mora padkreśliła, što ŭ bolšaści krain admiena śmiarotnaj kary była mienavita palityčnym rašeńniem, a zatym «spatrebiłasia šmat namahańniaŭ i času, kab pierakanać ludziej u nieabchodnaści hetaha kroku».

U svaju čarhu pasoł Francyi ŭ Biełarusi Mišel Reniery nahadaŭ, što pazicyja jaho krainy pa hetym pytańni niepachisnaja.

«Francyja vystupaje suprać śmiarotnaj kary pry lubych akaličnaściach, — skazaŭ jon. — Admiena śmiarotnaj kary — heta nie tolki palityčnaje rašeńnie, heta pieršym čynam pytańnie marali i sumleńnia».

Biełaruś — adzinaja jeŭrapiejskaja kraina, jakaja nie ŭvachodzić u Rady Jeŭropy. Hałoŭnaj pryčynaj źjaŭlajecca najaŭnaść u krainie śmiarotnaj kary. Tolki z pačatku 2013 hoda biełaruskimi sudami vyniesieny try śmiarotnyja pryhavory.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?