«Biełaruskaja pravasłaŭnaja carkva nastojliva źviartała ŭvahu hramadzkaści na prablemu śmiarotnaha pakarańnia jašče ŭ dzievianostych hadach minułaha stahodździa. U 1996 hodzie napiaredadni ŭsienarodnaha referendumu, na jakim, siarod inšaha, abmiarkoŭvałasia pytańnie ab śmiarotnaj kary, my zaklikali biełaruski narod admovicca ad takoj miery pakarańnia», — havorycca ŭ zvarocie mitrapalita Mienskaha i Słuckaha, patryjaršaha ekzarcha ŭsiaje Biełarusi Fiłareta da ŭdzielnikaŭ kruhłaha stała «Relihija i śmiarotnaje pakarańnie», jaki prachodzić u Miensku.

«My, chryścijanie, nia možam apraŭdvać śmiarotnaje pakarańnie, bo heta hrech zabojstva... Žyćcio luboha čałavieka naležyć jaho Tvarcu, Bohu. Nia my, hrešnyja ludzi, daravali byćcio čałavieku, nia nam i pazbaŭlać čałavieka isnavańnia. Bo za žyćcio kožnaha z nas Haspodź Isus Chrystos addaŭ svajo žyćcio, źviedaŭšy pakuty, źniavahi, ździeki i śmierć na Kryžy... Dziaržava, karajučy svaich hramadzian śmierciu, kožny raz nanova raśpinaje Chrysta», — cytuje vitalnaje słova mitrapalita Fiłareta Interfaks.

«Takoj była naša pazycyja ŭ hod referendumu. Na siońnia jana zastałasia niaźmiennaj», — padkreśliŭ kiraŭnik BPC.

Spasyłajučysia na Asnovy sacyjalnaj kancepcyi RPC, mitrapalit adznačyŭ, što «siońnia mnohija dziaržavy admianili śmiarotnaje pakarańnie pavodle zakonu albo nie ažyćciaŭlajuć jaho na praktycy. Pamiatajučy, što miłasernaść da čałavieka, jaki paŭ, zaŭsiody bolš pažadanaja za pomstu, Carkva vitaje takija kroki dziaržaŭnych uładaŭ».

Mitrapalit Fiłaret taksama nahadaŭ, što patryjarch Kirył i jaho papiarednik patryjarch Alaksij II u svoj čas vykazvalisia na karyść admieny śmiarotnaj kary.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?