Natalla Hierman.

Natalla Hierman.

Vice-premjer i ministar zamiežnych spraŭ Małdovy Natalla Hierman paprasiła Vašynhton «intensyfikavać» palityčnyja i ekanamičnyja dačynieńni z Kišynevam, kab dapamahčy Małdovie supraćstajać «źniešniamu cisku».

Natalla Hierman vystupała 18 vieraśnia ŭ Eŭrapiejskim instytucie ŭ Vašynhtonie na kanferencyi, pryśviečanaj Uschodniamu partnerstvu i pamknieńniu postsavieckich krainaŭ da demakratyi, paviedamlaje radyjo «Svaboda».

Sa słovaŭ Hierman vynikała, što dapamoha ZŠA patrebnaja Małdovie i tamu, što sam Eŭraźviaz nia ŭ zmozie źniać usie pieraškody na šlachu postsavieckich krainaŭ da eŭrapiejskaj intehracyi.

U hetym kantekście jana zhadała niadaŭniaje rašeńnie Armenii, taksama ŭdzielnicy Ŭschodniaha partnerstva, dałučycca da inśpiravanaha Maskvoj Mytnaha sajuzu: «Krainy Ŭschodniaha partnerstva vielmi roznyja — jany roźniacca pamierami, hieahrafičnym miescaznachodžańniem i kolkaściu nasielnictva dy, što samaje važnaje, svaim žadańniem pravieści demakratyčnyja reformy i transfarmavacca.

Adziny padychod da nas usich — niepraduktyŭny. Darečy, apošnija padziei ŭ Armenii, ja bajusia, vyrazna pakazali, što rehijanalny padychod Eŭraźviazu va Ŭschodnim partnerstvie paciarpieŭ žorstkuju parazu», — zajaviła Hierman.

U hetym miesiacy Rasieja zabaraniła impart małdaŭskaha vina, što analityki aceńvajuć jak pakarańnie, jakoje Maskva nakłała na Kišyneŭ za jaho prasoŭvańnie na šlachu da padpisańnia pahadnieńnia ab svabodnym handli z Bruselem.

Nahadajem, što taksama ŭ hetym miesiacy prezydent Rasiei Uładzimir Pucin papiaredziŭ Ukrainu ab pryniaćci adpaviednych ekanamična-handlovych zachadaŭ Mytnym sajuzam u vypadku, kali Kijeŭ padpiša z Bruselem pahadnieńnie ab svabodnym handli.

Vystupajučy na zhadanaj kanferencyi ŭ Vašynhtonie, vice-śpiker litoŭskaha parlamentu Piatras Aŭštravičus zaklikaŭ mižnarodnuju supolnaść supraćstajać cisku Maskvy na krainy-ŭdzielnicy Ŭschodniaha partnerstva: «Ja chacieŭ by paprasić usie eŭrapiejskija krainy i eŭrapiejskija instytucyi zastavacca pilnymi i mocnymi dy dapamahčy Małdovie, kab jana zmahałasia z hetymi pravakacyjami z boku Maskvy nie adna. U inšym vypadku my ŭbačym toje, čaho nia chočam bačyć, i prykładam hetamu — Armenija», — skazaŭ Aŭštravičus.

Jak inšy prykład niepažadanaha raźvićcia padziej, litoŭski palityk nazvaŭ Biełaruś:«Biełaruś nijakim čynam nie źjaŭlajecca partneram ni Eŭraźviazu, ni transatlantyčnaj supolnaści. Heta samaizalavanaja kraina, kiravanaja dyktataram, jakaja, vierahodna, choča rabić niejkija prynahodnyja rečy z Eŭraźviazam, adnak nie vyjaŭlaje nijakaj zacikaŭlenaści ŭ demakratyzacyi i dałučeńni da ahulnaeŭrapiejskich strukturaŭ», — skazaŭ Aŭštravičus.

Pra cisk Rasiei na krainy-ŭdzielnicy Ŭschodniaha partnerstva havaryŭ i kamisar Eŭraźviazu Štefan Fiule na plenarnym pasiedžańni Eŭrapiejskaha parlamentu ŭ Strasbury 11 vieraśnia.

U svaim vystupie Fiule padkreśliŭ, što siabroŭstva ŭ Mytnym sajuzie, jaki ciapier uklučaje Rasieju, Biełaruś i Kazachstan, niesumiaščalnaje z «hłybokimi i ŭsioabdymnymi zonami volnaha handlu», pieramovy pra stvareńnie jakich Brusel viadzie z Ukrainaj, Małdovaj, Hruzijaj i Armenijaj.

Tym nia mienš jon dadaŭ, što Eŭraźviaz maje namier supracoŭničać z Mytnym sajuzam, kab padciahnuć jaho normy i standarty da mižnarodnaha ŭzroŭniu.

Ahienctva navinaŭ Biełaruskaha telebačańnia, pavodle pradstaŭnictva Eŭraźviazu ŭ Miensku, dapuściła infarmacyjnuju manipulacyju, paviedamiŭšy, što, pavodle Fiule, «Eŭraźviaz u pieršuju čarhu zacikaŭleny ŭ tradycyjna mocnych suviaziach svaich uschodnich partneraŭ z Maskvoj.

Eŭrakamisar taksama dadaŭ, što Brusel akaža Mytnamu sajuzu dapamohu ŭ vyraŭnoŭvańni standartaŭ i normaŭ u adpaviednaści z eŭrapiejskim i suśvietnym zakanadaŭstvam».

Pra zajavu Fiule ab niesumiaščalnaści siabroŭstva ŭ Mytnym sajuzie i ŭdziełu ŭ zonie svabodnaha handlu z Eŭraźviazam BT pramaŭčała.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?