Arhkamitet pa stvareńni partyi «Biełaruskaja chryścijanskaja demakratyja» vykazvaje abureńnie dziejańniami administracyi turmy № 1 u Hrodnie, u vyniku jakich palitźniavoleny Mikałaj Aŭtuchovič byŭ vymušany skarystać krajnija miery, kab supraćstajać nacisku, paviedamlaje pres-słužba arhanizacyi.

Nahadajem, siońnia pryvatnaja kulturna-aśvietnaja ŭstanova Platform Innovation raspaŭsiudziła infarmacyju sa spasyłkaj na kanfidencyjalnuju krynicu ŭ hrodzienskaj turmie ab tym, što Aŭtuchovič nanios siabie ciažkija cialesnyja paškodžańni — u znak pratestu parezaŭ lazom žyvot.

Pryčynaj stała ździeklivaje staŭleńnie administracyi turmy da asudžanaha. Pavodle źviestak krynicy, ciapier Aŭtuchovič adčuvaje siabie narmalna, jon pieraviedzieny nazad u kamieru, stan jaho zdaroŭja zdavalniaje.

Arhkamitet BCHD «rasceńvaje dziejańni ŭ dačynieńni da viaźnia jak katavańni». «My ličym, što poŭnaja adkaznaść za toje, što zdaryłasia, lažyć na administracyi turmy, i nahadvajem, što ŭ Kryminalnym kodeksie Biełarusi jość artykuł «Daviadzieńnie da samahubstva», — zajaŭlajuć u arhanizacyi.

BCHD patrabuje nieadkładna spynić katavańni ŭ dačynieńni da Aŭtuchoviča, vyzvalić jaho, a taksama pryciahnuć da kryminalnaj adkaznaści kiraŭnictva turmy.

Akramia taho, BCHD zaklikaje biełaruskuju hramadzianskuju supolnaść i mižnarodnyja arhanizacyi patrabavać spynieńnia katavańniaŭ u Biełarusi i vyzvaleńnia Aŭtuchoviča, a taksama inšych palitźniavolenych.

Vypadak z Aŭtuchovičam, adznačajuć u BCHD, «vyrazna ilustruje toj fakt, što ŭ Biełarusi adsutničaje demakratyzacyja i palapšeńnie situacyi, ale praciahvajecca mietadyčnaje źniščeńnie apanientaŭ dziejnaha režymu».

Mikałaj Aŭtuchovič, hramadski aktyvist i vieteran afhanskaj vajny, byŭ aryštavany 8 lutaha 2009. Za pieravozku i zachoŭvańnie piaci patronaŭ da palaŭničaj vintoŭki Viarchoŭny sud u mai 2010 pryznaŭ jaho vinavatym na padstavie art. 295, č. 3 KK (niezakonnyja dziejańni ŭ dačynieńni da ahniastrelnaja zbroi, bojeprypasaŭ i vybuchovych rečyvaŭ) i pryhavaryŭ da piaci hadoŭ i dvuch miesiacaŭ pazbaŭleńnia voli va ŭmovach strohaha režymu.

Aŭtuchovič pavinien vyjści na volu ŭ krasaviku 2014 hoda.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?