Fota AFP 2013/Glenn Chapman
Chakieram z Hiermanii atrymałasia ŭzłamać skanier adbitkaŭ palcaŭ Touch ID na iPhone 5S, paviedamlaje RIA Novosti.
Pa ich słovach, dla hetaha im spatrebiłasia sfatahrafavać adbitak palca ŭładalnika iPhone sa šklanoj pavierchni. Eśpierty pa biaśpiecy kažuć, što ŭzłom byŭ čakanym, a sam praces — nieskładanym.
Heta vynikaje z apytańnia, praviedzienaha sajtam Digit.ru.
«Hety mietad daloka nie novy i z pośpiecham vykarystoŭvajecca dla abychodu sistem biaśpieki, zasnavanych na adbitku palca, prajšło ŭžo šmat hadoŭ z taho času, jak źjaviłasia mahčymaść rabić zdymki vysokaj jakaści, a taksama źjavilisia technałohii druku, jakija dazvalajuć ažyćciaŭlać vysakakłasnuju piačatku ź vialikaj kolkaściu kropak na calu (DPI). Patrebien tolki dobry ŭzor», — raspavioŭ antyvirusny ekśpiert «Łabaratoryi Kaśpierskaha» Siarhiej Łožkin.
Pa jaho słovach, sistemy biaśpieki, zasnavanyja vyklučna na bijamietryčnaj aŭtaryzacyi z dapamohaj adbitkaŭ palcaŭ, nie efiektyŭnyja i mohuć słužyć tolki dadatkovym mietadam aŭtentyfikacyi.
Namieśnik kiraŭnika łabaratoryi pa kamputarnaj kryminalistycy Group-IB Siarhiej Nikicin ličyć, što prablemu ŭraźlivaści skanier adbitkaŭ palcaŭ sapraŭdy varta ličyć realnaj pahrozaj, adnak nie varta zabyvać, što siarod usich smartfonaŭ, na siońniašni dzień jana aktualnaja tolki dla iPhone 5S.
«Skaniery adbitkaŭ palcaŭ u sučasnym vykanańni — heta vielmi ŭraźlivaja technałohija, uličvajučy mahčymaści 3D-druku i fatahrafavańnia ŭ vysokaj jakaści. Ujavicie sabie, my pakidajem svaje adbitki paŭsiul, i pry ich karektnym źniaćci, uznavić ich zuism nie składana», — skazaŭ Nikicin.
Pa słovach ekśpierta, da takoj ataki ŭraźlivyja bolšaść skanieraŭ na rynku, prablemy lažać u samoj asnovie hetaj technałohii, tamu vypravić hetuju prablemu paprostu niemahčyma.
Bijamietryju varta vykarystoŭvać tolki jak dadatkovy faktar, a nie jak adziny srodak zabieśpiačeńnia biaśpieki. Adnak dadzienaja technałohija, ličyć Nikicin, niahledziačy na svaje zahany, budzie karystacca papularnaściu z-za zručnaści i chutkaści. Bo prycisnuć palec da knopki smartfona chutčej, čym jaho razbłakavać z dapamohaj ŭviadzieńnia koda.
U pres-słužbie kampanii «Doktar Veb» paviedamili, što ŭ schiemie ŭzłomu skaniera niama ničoha niezvyčajnaha. «Padobnyja adbitki ŭžo vyrablalisia na čornym rynku dla tych sistem, jakija pracujuć na asnovie raspaznańnia adbitkaŭ palcaŭ. Jany vielmi raspaŭsiudžany i jość navat niekalki videa na sajtach videa-chostynhaŭ z padrabiaznaj instrukcyjaj hetaha», — prakamientavali ŭ kampanii.
Ekśpierty «Doktara Veb» ličać, što, chutčej za ŭsio, matyvacyjaj patencyjnych złačyncaŭ budzie metavy ŭzłom, a nie atrymańnie dostupu da smartfona paśla vypadkovaha kradziažu. «Heta nie tolki prablema Apple, a ŭ cełym sistem raspaznańnia adbitkaŭ palcaŭ. Imhniennaha rašeńnia tut čakać nie varta», — paviedamili ŭ «Doktara Veb».
