Andrej Mirančuk viadzie ŭ internecie papularny błoh ab akcyjach avijakampanijach, mahčymaści tanna padarožničać dla biełarusaŭ — vandrouki.by. Prajekt karystajecca papularnaściu, naprykład, u «Ukantakcie» na supołku padpisana bolš za 11 tysiač čałaviek i kolkaść praciahvaje raści.
«Žyŭ cichim i spakojnym žyćciom, — kaža Andrej, — pakul mnie dasłali pahrozu (ci prapanovu) ab tym, što raptam słovazłučeńnie „Zimnija alimpijskija hulni“, „Sočy-2014“ zapatentavanyja ŭ Rasii i ja nie maju prava ich vykarystoŭvać na sajcie».
Nie tak daŭno na «Vandroŭkach» prajšła infarmacyja, što «Biełavia» pakul nie ŭźvinciła košty na paloty ŭ Sočy na čas Alimpijady, u adroźnieńni ad bolšaści avijakampanij śvietu. Azdobleny materyjał byŭ emblemaj Hulniaj u Sočy.
List Mirančuk atrymaŭ list ad imia Aŭtanomnaj niekamiercyjnaj arhanizacyi «Arhanizacyjny kamitet CHCHII Alimpijskich zimovych hulniaŭ u Sočy», dzie adznačajecca, što «pravy na takija najmieńni jak „Alimpijski“, „Alimpijada“, „Sočy 2014“, „Olympic“, „Olympian“, „Olympiad“, „Sochy 2014“ i vytvornyja ad ich słovazłučeńni, a taksama simvał, fakieł, ahoń, himny, deviz, emblema naležać Arhkamitetu „Sočy-2014“ i Mižnarodnamu alimpijskamu kamitetu».
«Vykarystańnie alimpijskaj i paraalimpijskaj simvoliki ŭ sastavie damiennaha imia, u kantekście sajta i inšymi sposabami, dapuskajecca tolki pry ŭmovie zaklučeńnia adpaviednaj damovy ź Mižnarodnym alimpijskim kamitetam i Arhkamitetam „Sočy-2014“.
„Pakolki ŭ mianie nie było žadańnia dziela adnaho artykuła zaklučać niejkija pahadnieńni, to vydaliŭ materyjał, — kaža Mirančuk. — Metaj materyjału było stymulavańnie naviedvańnia Alimpijady hramadzianami Biełarusi. U budučyni ja ni ŭ jakim razie nie budu pisać pra Alimpijadu. My zrobim usio mahčymaje, kab adharadzić čytačoŭ błoha ad naviedvańnia Alimpijady ŭ Sočy“, — adkazaŭ Mirančuk Arhkamitetu.
