Užo ŭ kampiensavany čas futbolnaj hulni pamiž hrodzienskim «Niomanam» i minskim «Dynama» na poli zaviazałasia bojka. Syšlisia paŭabaroncy Hi Esamie i Arciom Bykaŭ.
«Bykaŭ pavinien hladzieć za futbalistami ŭzroŭniu Esamie, a nie rabić rasisckija zaŭvahi», — skazaŭ u intervju goals.by futbalist «Niomana» Ihar Jasinki.
«Dla mianie takoha futbalora, jak Bykaŭ, bolš nie isnuje», — słovy hałoŭnaha treniera hrodziencaŭ Siarhieja Saładoŭnikava.
Sam Esamie ŭ ekspres-kamientary skazaŭ, što pytańnie z Bykavym jany vyrašyli, biełarus paprasiŭ prabačeńni. «Usio okiej», — skazaŭ kamieruniec.
«Nami budzie praviedziena raźbiralnictva z nahody incydentu, jaki mieŭ miesca 22 vieraśnia ŭ matčy 24-ha tura čempijanatu Biełarusi pamiž kamandami „Nioman“ i „Dynama“. U vypadku, kali budzie ŭstanoŭlena, što z boku hulca našaj kamandy sapraŭdy mieli miesca prajavy rasizmu, vinavataha čakaje strohaje pakarańnie», — heta aficyjnaja zajava minskaha «Dynama».
Jakim čynam Bykaŭ abražaŭ Esamie nichto nie kaža. Apošni rasiscki skandał u biełaruskim futbole zdaryŭsia hod tamu, kali sieniehalec Paskal Miendzi z žodzinskaha «Tarpieda» abvinavaciŭ «Šachciora» Alaksieja Ryjosa (jon na paŭbiełarus, na paŭpieruaniec), što toj nazyvaŭ jaho «čornaj małpaj». Adnak nijakich dokazaŭ hetamu tak i nie było.
Bykaŭ — adzin z najbolš talenavitych maładych biełaruskich futbalistaŭ. Hi Esamie były hulec zbornaj Kamieruna, jaki maje vialiki dośvied hulni ŭ čempijanacie Rasii.
