Pasolstva Rasii nakiravała ŭ MZS Biełarusi zapyt na sustreču z Uładzisłavam Baŭmhiertnieram, paviedamiŭ BiełaPAN rasijski konsuł Ihar Karahin. Infarmacyi pra miescaznachodžańnie aryštavanaha hiendyrektara «Urałkalija» pa-raniejšamu niama.
Pavodle słoŭ konsuła, zhodna ź Vienskaj kanviencyjaj biełaruski bok pavinien dać adkaz na praciahu troch sutak.
Karahin taksama zaznačyŭ, što dahetul u pasolstva niama infarmacyi pra toje, dzie znachodzicca Baŭmhiertnier. «Advakaty maŭčać, ź imi pakul suviazi niama», — skazaŭ dypłamat.
Ab miescaznachodžańni svajho padabaronnaha Baŭmhiertniera advakat Dźmitryj Haračka sprabavaŭ daviedacca z ranicy 23 vieraśnia.
Prykładna ŭ 12.30 advakat paraiŭ BiełaPAN patelefanavać jamu praz try hadziny, admoviŭšysia ad jakich-niebudź kamientaryjaŭ, ale zaraz telefon Harački adklučany.
Na pytańnie ab miescaznachodžańni Baŭmhiertniera nie mohuć adkazać ni ŭ KDB, ni ŭ Śledčym kamitecie Biełarusi.
Hramadzianin Rasii, hiendyrektar «Urałkalija», kiraŭnik naziralnaha savieta biełaruska-rasijskaha ZAT «Biełaruskaja kalijnaja kampanija» Uładzisłaŭ Baŭmhiertnier byŭ aryštavany ŭ Minsku 26 žniŭnia i źmieščany ŭ śledčy izalatar KDB pavodle abvinavačańnia ŭ złoŭžyvańni ŭładaj i słužbovymi paŭnamoctvami.
16 vieraśnia namieśnik hienprakurora Rasii Alaksandr Źviahincaŭ paviedamiŭ, što Biełaruś pryniała rašeńnie vyłučyć materyjały ŭ dačynieńni da rasijskich hramadzian, jakija prachodziać pa hetaj kryminalnaj spravie, u asobnuju vytvorčaść i pieradać ich u Hienprakuraturu RF.
19 vieraśnia na naradzie pa najaŭnych ekanamičnych i źniešniepalityčnych pytańniach Alaksandr Łukašenka nie vyklučyŭ mahčymaści ekstradycyi Baŭmhiertniera ŭ Rasiju dla praviadzieńnia śledčych dziejańniaŭ.
20 vieraśnia pamočnik prezidenta Rasii Juryj Ušakoŭ zajaviŭ, što Kreml čakaje chutkaj vydačy Baŭmhiertniera, adnak hety praces «krychu zaciahvajecca».
«Učarašnija słovy prezidenta Biełarusi dazvalajuć spadziavacca, što hetaje pytańnie budzie najbližejšym časam vyrašana», — skazaŭ jon.
21 vieraśnia rasijskaje vydańnie «Kommiersant'» paviedamiła sa spasyłkaj na svaje krynicy, što zatrymka z vydačaj Baŭmhiertniera źviazana z patrabavańniem Minska pradoŭžyć jaho kryminalny pieraśled u Rasii.
Pavodle nieaficyjnaj infarmacyi, situacyja z kryminalnym pieraśledam hiendyrektara «Urałkalija» moža być vyniesiena na abmierkavańnie prezidentaŭ Biełarusi i Rasii ŭ vypadku ich dvuchbakovaj sustrečy ŭ miežach siońniašniaha samitu ADKB u Sočy.
Na dumku niekatorych analitykaŭ, sama mahčymaść takoj sustrečy źviazana mienavita z vydačaj Baŭmhiertniera rasijskamu boku.
