Alaksandr Łukašenka i Uładzimir Pucin 23 vieraśnia koratka abmierkavali «na palach» samitu ADKB ŭ Sočy temu «Urałkalija», paviedamiŭ žurnalistam pres-sakratar prezidenta Rasii Dźmitryj Piaskoŭ.
«Pucin i Łukašenka na palach samitu sustrakalisia siońnia. Heta była niepraciahłaja sustreča sam-nasam. Vielmi koratka tema „Urałkalija“ zakranałasia», — cytuje Piaskova RIA Novosti.
Pres-sakratar nie zmoh adkazać na pytańnie, ci vydaść biełaruski bok hiendyrektara «Urałkalija» Uładzisłava Baŭmhiertniera Rasii.
19 vieraśnia na naradzie pa najaŭnych ekanamičnych i źniešniepalityčnych pytańniach Alaksandr Łukašenka nie vyklučyŭ mahčymaści ekstradycyi Baŭmhiertniera ŭ Rasiju dla praviadzieńnia śledčych dziejańniaŭ.
20 vieraśnia pamočnik prezidenta Rasii Juryj Ušakoŭ zajaviŭ, što Kreml čakaje chutkaj vydačy Baŭmhiertniera, adnak hety praces «krychu zaciahvajecca».
«Učarašnija słovy prezidenta Biełarusi dazvalajuć spadziavacca, što hetaje pytańnie budzie najbližejšym časam vyrašana», — skazaŭ jon.
21 vieraśnia rasijskaje vydańnie «Kommiersant'» paviedamiła sa spasyłkaj na svaje krynicy, što zatrymka z vydačaj Baŭmhiertniera źviazana z patrabavańniem Minska praciahnuć jaho kryminalny pieraśled u Rasii.
Tym časam niama nijakaj infarmacyi pra toje, ci pa-raniejšamu Baŭmhiertnier znachodzicca SIZA KDB.
Siońnia pasolstva Rasii ŭ Minsku nakiravała ŭ MZS Biełarusi zapyt na sustreču z Baŭmhiertnieram.
Jak paviedamiŭ BiełaPAN rasijski konsuł Ihar Karahin, dahetul u pasolstva niama infarmacyi pra toje, dzie znachodzicca aryštavany hiendyrektar «Urałkalija».
KDB, Śledčy kamitet, a taksama advakaty Baŭmhiertniera ničoha nie kamientujuć.
