Alaksandr Alesin, fota svaboda.org
Łukašenka na pasiedžańni Rady kalektyŭnaj biaśpieki ŭ Sočy havaryŭ pra Syryju j Tadžykistan, ale hałoŭny jahony kłopat — u inšym, paviedamlaje radyjo «Svaboda».
«Pa Syryi, pa inšych prablemach my dziejničajem u adzinym klučy z Rasiejskaj Federacyjaj, našym asnoŭnym stratehičnym partneram, našaj brackaj respublikaj.
U nas absalutna niama nijakich roznahałośsiaŭ, hetaksama jak ich niama ź dziaržavami — siabrami ADKB», — zajaviŭ Alaksandar Łukašenka, vystupajučy na pasiedžańni Rady kalektyŭnaj biaśpieki ŭ Sočy.
Dla Alaksandra Łukašenki źjaviłasia čarhovaja mahčymaść nahadać Rasiei, što treba dbać pra biełaruskaje vojska — ličyć vajskovy analityk Alaksandar Alesin: «Heta čarhovaja mahčymaść nahadać Rasiei, što Biełaruś — vierny sajuźnik, što na zachadzie jość u jaje pieradavy placdarm, i ŭ takoj jakaści Rasieja musić svajho sajuźnika ŭmacoŭvać. Ciapier sytuacyja pa niekatorych vidach uzbrajeńnia blizkaja da krytyčnaj. Śpisańnie frantavych bambavikoŭ SU-24, niezrazumiełaja sytuacyja sa źniščalnikami SU-27.
Heta kala 50 samalotaŭ. Kali ich adrazu śpisać, to rezka źmianšajecca nia tolki ŭdarnaja mahutnaść, ale mahčymaści pierachopu pavietranych celaŭ.
Ciapier čas pryniaćcia rašeńniaŭ. Adzin z varyjantaŭ — pajści pa šlachu zamiaščeńnia biełaruskich vojskaŭ na terytoryi Biełarusi rasiejskimi, jak my bačym hetuju sprobu stvareńnia avijabazy ŭ Lidzie. Dalej znos vojska budzie tolki narastać, vojska budzie słabieć.
A Rasieja zacikaŭlenaja ŭ tym, kab jaje abarona nie słabieła. Tamu albo jana budzie ŭmacoŭvać biełaruskaje vojska, albo budzie zamiaščać biełaruskaje vojska svaimi vojskami na našaj terytoryi.
Tamu ŭ perspektyvie mahčymaje źjaŭleńnie jašče niekalkich rasiejskich bazaŭ na terytoryi Biełarusi.
Adnak Łukašenku heta daść vialikija imidžavyja straty, asabliva napiaredadni vybaraŭ 2015 hodu. Tamu, mnie zdajecca, jon sprabuje damovicca z Pucinym, kab Rasieja pavialičyła svaju dapamohu našamu vojsku, i vyrašyć našyja prablemy biez pašyreńnia rasiejskaj vajskovaj prysutnaści».
Što tyčycca mahčymaha ŭdziełu biełaruskich vajskoŭcaŭ, to Alaksandr Alesin pierakonvaje: udzieł biełaruskich vajskoŭcaŭ u takich misijach vyklučna dobraachvotny: «Jość dakumanty, jakija rehulujuć udzieł biełaruskich vajennasłužačych u mižnarodnych misijach i misijach AAN.
Heta adbyvajecca pa asabistaj zajavie hramadzian i asabistym dazvole kiraŭnika dziaržavy. Prymusova nikoha tudy pasłać nielha. U nas jość farmavańni, jakija rychtujucca da ŭdziełu ŭ takich misijach. Jość persanał — i MNS, i medyki, — jakija udzielničajuć u takich misijach.
Ja nie vyklučaju, što našaja miratvorčaja rota, jakaja ŭ nas na bazie 120 bryhady rychtujecca, moža ŭdzielničać u miratvorčaj misii ŭ Siryi, kali budzie rašeńnie SB AAN. Što tyčycca Tadžykistana, to jość miratvorčyja siły ADKB.
My tudy vydzialajem dźvie bryhady admysłovaha pryznačeńnia — adna bryhada śpiecnazu ŭnutranych vojsk i bryhada armiejskaha śpiecnazu. Plus siły MČS i siły śledčaha aparatu dla viadzieńnia nieabchodnych dziejańniaŭ padčas nadzvyčajnych sytuacyjaj.
Ale pryncyp dziejańnia taki samy — hetyja ludzi musiać być dobraachvotnikami. Pa Kanstytucyi ŭ nas zabaroniena vajennasłužačym ŭ prykaznym paradku ŭdzielničać u vajskovym dziejańniach na terytoryi zamiežnych dziaržavaŭ.
Tolki na dobraachvotnaj asnovie, i ADKB taksama treba budzie atrymlivać mandat AAN».
